बिहिवार, माघ ९, २०७६
    पर्यटन समाचार

    योगदान र लोकप्रियताको आधारमा टिकट वितरण हुनुपर्ने पौडेलको सुझाव

    सोमबार, २८ चैत्र २०७३, आहाखबर

    धनगढीः सत्तारुढ काँग्रेसले ७ नं प्रदेशअन्तर्गत पर्ने कैलालीको अत्तरियाबाट चुनावी आमसभा थालेको छ । आइतबार आयोजित सभामा काँग्रेसका नेताहरुले वीपी कोइरालालाई सम्झिँदै स्थानीय तहको निर्वाचनमा बहुमत ल्याउने उदघोषसमेत गरेका छन् । 

    काँग्रेस सभापति शेरबहादुर देउवाले एमाले जस्तो जिम्मेवार पार्टी विभिन्न वर्गका जनताकाबीचमा द्वन्द्व सिर्जना गर्ने षडयन्त्रमा लागेको आरोप लगाए । एमाले अध्यक्ष केपी ओलीतर्फ लक्षित गर्दै देउवाले भने, “उखानटुक्का र मधेस विरोधी भावनाले देश बन्दैन ।” बिनाकारण एमालेले मधेसी जनतालाई चिढाएको देउवाको तर्क थियो । 

    देशको विकास काँग्रेसले मात्रै गर्नसक्ने बताउँदै उनले मिलेर बसेको समाजलाई बिखण्डन गर्ने तत्वप्रति सचेत रहन आग्रह गरे । काँग्रेस वरिष्ठ नेता रामचन्द्र पौडेलले देशमा दशकौँदेखि भएका आन्दोलनले राजनीतिक व्यवस्थाको छिनोफानो गरिसकेकाले अब कृषि, पर्यटन, ऊर्जाको अधिकतम उपयोग गरी मुलुकलाई समृद्धिको बाटोमा लैजान सकिने बताए । 

    नेता पौडेलले १० वर्षमा देशलाई समृद्धिको दिशामा लैजाने काममा काँग्रेस लागेको बताए । एमालेले राष्ट्रवादको भ्रम फैलाइरहेको आरोप लगाउँदै उनले मधेसी जनता के–कारणले रिसाए भनेर आत्मसमीक्षा गर्न एमालेलाई आग्रह गरे । 

    पौडेलले भने, “कम्युनिष्ट समस्या सिर्जना गर्छन्, समस्याको समाधान काँग्रेसले गर्छ ।” पौडेलले मधेसी मोर्चा सम्बद्ध दलतर्फ लक्षित गर्दै ठूलो परिवर्तनपछि बनेको संविधानले सङ्घीयता, लोकतन्त्र, समावेशीजस्ता उपलब्धि दिएकाले यी उपलब्धिलाई संस्थागत गर्नेतर्फ लाग्नुपर्छ भने । 

    नेता पौडेलले आगामी चुनावमा काँग्रेलाई धोका हुनु हँुदैन भने  । नेता कार्यकर्ताको योगदान क्षमता र लोकप्रियताका आधारमा आगामी चुनावमा टिकट वितरण गर्न सल्लाह दिँदै पौडेलले भने, “पार्टी पद्धति र सहमतिमा नै चलाउनुपर्छ यसो हुनसकेमा मात्र काँग्रेसलाई कसैले हराउन सक्दैन ।”

    काँग्रेसका महामन्त्री डा शशाङ्क कोइरालाले गरिब र धनीबीच रहेको दूरी कम गर्नु नै काँग्रेसको समाजवाद रहेको उल्लेख गर्दै कम्युनिष्ट विचार संसारबाट समाप्त भइसकेको बताए । काँग्रेसभित्रको गुटबन्दीको अन्त्य हुनसकेमा मात्र सफलतामा पुग्न सकिने उनको भनाइ थियो । 

    महामन्त्री कोइरालाले चुनावमा जसले टिकट पाउँछ त्यसलाई जिताउन सबैले लाग्नुपर्ने बताउँदै भने, “चुनावमा बागी उम्मेदवार भई पार्टी पराजित गर्नेलाई कारबाही गरिनेछ ।” 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast