सोमबार, असोज ६, २०७६
    मुभी-थिएटर

    मुसहर बस्ती बनाउन धुर्मुस-सुन्तलीले जुटाए दुई करोड, अढाई करोड अझै अपुग

    शनिबार, २९ माघ २०७३, आहाखबर

    बर्दिबासः मुसहर बस्ती निर्माणका लागि अष्ट्रेलियाबाट ६५ लाख सहयोग रकम संकलन गरेर स्वदेश फर्के लगतै धुर्मुस (हास्य कलाकार सीताराम कट्टेल) महोत्तरीको बर्दिबासस्थित निर्माणधिन एकीकृत नमुना मुसहर बस्ती निर्माणमा श्रमदानमा जुटेका छन् ।

    अष्ट्रेलियाबाट आएकै दिन कट्टेल र कुञ्जना घिमिरे (सुन्तली)द्धारा स्थापिक संस्था धुर्मुस सुन्तली फाउण्डेशनलाई तराई मधेसबाट एक लाख रुपियाँ बराबरको सहयोग रकम थपिएको छ । महोत्तरी बर्दिबासस्थित गौतम होटलका सञ्चालक हिरा गौतमले बस्ती निर्माण स्थलमा पुगेर एक लाख रुपियाँ बराबरकोे चेक हस्तान्तरण गरेका छन् । 

    बस्ती निर्माणमा साबेलले मसाला फिट्दै गरेका धुर्मुसलाई भेटेर उनले चेक हस्तन्तरण गरेका हुन् । गौतमले मुसहर बस्ती निर्माणले तराई, पहाड र हिमाललाई एउटै मालामा उन्ने काम भएको  भन्दै यस कार्यमा सबैले खुलेर सहयोग गर्नुपर्ने बताए । 

    मुसहर बस्तीको निर्माण कार्य सम्पन्न गरि बैशाख १ गते घरबार बिहीन मुसहरहरुलाई नयाँ घरमा प्रवेश गराउने घुुर्मुस र सुन्तलीको योजना छ । निर्माण कार्य सम्पन्न गर्न अब दुई महिना समय मात्रै बाँकी रहेको जनाइएको छ । हालसम्म ३५ प्रतिशत काम सकिएको र समयमै सम्पन्न गर्नेगरी काम भइरहेको धुर्मुसले बताएका छन् । 

    स्थानीयहरुसँग मिलेर श्रमदानमा खटिएका धुर्मुसले उक्त कार्यमा आवश्यक प्रवन्ध मिलाउन सुन्तलीलाई काठमाडौंमै खटाएका छन् । हालसम्म झन्डै दुई करोड रुपियाँभन्दा बढी रकम संकलन भए पनि बस्ती निर्माणका लागि अझै दुई करोड ५० लाख रुपियाँ रकम अपुग रहेको जनाइएको छ । 

    उक्त रकम जुटाउन उद्योगी, व्यापारी, समासेवी र अरु सहयोगी मनहरुसँग धुर्मुस सुन्तलीले अनुरोध गरेका छन् । बस्ती निर्माणमा झन्डै चार करोड ७८ लाख रुपियाँ खर्च हुने अनुमान गरिएको छ । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast