समाज

कञ्चनपरमा पहिलाे पटक  ‘गोप्रो क्यामेरा’, क्यामेरा भिरेर ‘फिल्ड’मा प्रहरी

कञ्चनपरमा पहिलाे पटक  ‘गोप्रो क्यामेरा’, क्यामेरा भिरेर ‘फिल्ड’मा प्रहरी

कञ्चनपुर: पहिलो पटक कञ्चनपुरमा सवारीसाधन जाँच गर्न  ‘गोप्रो क्यामेरा’ सञ्चालनमा आएको छ । प्रहरी र सेवाग्राहीलाई जवाफदेही र पारदर्शीताका लागि यहाँ शुरुआती चरणमा ६ वटा क्यामेरा प्रयोगमा ल्याइएको जिल्ला प्रहरी कार्यालयका प्रवक्ता प्रहरी नायब उपरीक्षक अमरबहादुर थापाले बताए ।

‘सवारीसाधन जाँचका क्रममा कुनै खाले विवाद सिर्जना भइहाले पनि यसले प्रमाण राख्न पनि सहज हुन्छ,’ उनले भने, ‘प्रहरीको प्रविधिमाथि पनि पहुँच बढिरहेको छ ।’उनले शुरुआतमा महेन्द्रनगर र आसपासका क्षेत्रमा थालिएको उक्त गोप्रो क्यामेराको प्रयोग जिल्लाभरका युनिटसम्म पु¥याउने योजना रहेको बताए । 
    
क्यामेरा जिल्ला प्रहरी प्रमुख प्रहरी उपरीक्षक मुकुन्द मरासिनीको पहलमा खरिद गरी कार्यक्षेत्रमा खटिने प्रहरीलाई प्रयोगका लागि दिइएको हो । 

‘हरेक दिनको भिडियोसहितको रेकर्ड जिल्लामा राख्ने काम पनि हुन्छ,’ प्रवक्ता थापाले भने, ‘ट्राफिक नियम पालना गरी दुर्घटना न्यूनीकरणका लागि सबैले सचेत हुन जरुरी छ ।’

उनले क्यामेराको प्रयोगले खटिने प्रहरी कर्मचारीकोसमेत गतिविधिमाथि निगरानी हुने बताए । सवारी जाँच खटिने प्रहरीले छातीमा क्यामेरा लगाउने भएकाले चालक र प्रहरी दुवैका गतिविधि अटो रेकर्ड हुन्छ । 

‘सवारी जाँचका क्रममा प्रहरीबाटै दर्व्यवहार भएका गुनासा पनि आउँछन्’, उनले भने, ‘अब यथार्थ थाहा पाउन पनि सहज हुन्छ ।’

प्रहरी र ट्राफिक प्रहरीले दुई दिनदेखि उक्त क्यामेराको प्रयोगसहित बजार र आसपासका क्षेत्रमा सवारी जाँच सक्रिय बनाएको छ । दुई दिनमा ५८ सवारी साधनमाथि कारवाही गरिएको प्रहरीले जनाएको छ ।