अनशनरत डा. गोविन्द केसीकाे अवस्था गम्भिर, जीवन बचाउन सरकारलाई आग्रह

अनशनरत डा. गोविन्द केसीकाे अवस्था गम्भिर, जीवन बचाउन सरकारलाई आग्रह

काठमाडौं, ९ असाेज । राष्ट्रिय मानवअधिकार आयोगले अनशनरत डाक्टर गोविन्द केसीकाे जीवन बचाउन सरकारलाई आग्रह गरेको छ। चिकित्सा शिक्षा सुधारको लागि सरकारसँग विगतमा भएका सम्झौताहरूको कार्यान्वयनको माग राखी अनसन बसेका डा. केसी गम्भिर बनेकाे छ । 

गत भदौ २९ गतेदेखि जुम्लामा आमरण अनसन थालेका केसीको अवस्था काठमाडौं ल्याएपछि झन बिग्रिएकाे भन्दै आयोग बोलेको हो। कर्णाली प्रदेश शाखा कार्यालय जुम्ला र प्रदेश कार्यालय बागमतीले अनसनस्थल जुम्लादेखि नै निरन्तर आयोगले केसीको अवस्था अनुगमन गरिरहेको पनि जनाएको छ।

आयोगले स्वास्थ्य अवस्था बिग्रिँदै गएपछि अनसनको नवौं दिन नेपालगञ्ज हुँदै काठमाडौं ल्याइएका केसीको अवस्था झन् खस्किएको दाबी गरेको छ। हाल शिक्षण अस्पतालमा रहेका केसीको स्वास्थ्य अवस्था स्थिर रहेको, शरीरको पोटासियम, म्याग्नेसियम र ग्लुकोजको मात्रा कम हुँदै गएको पनि आयोगले जनाएको छ।

‘पटक–पटकको अनसनका कारण शरीरमा रोग प्रतिरोधात्मक क्षमता कमजोर रहेकोले संक्रमणको उच्च जोखिम रहेको छ’, आयोगले भनेको छ, ‘ डा. केसीको जीवन रक्षाको लागि आवश्यक पहल गरिदिन अनुरोध गर्दै नेपाल चिकित्सक संघ लगायत विभिन्न संघ संस्थाहरुले आयोगमा ज्ञापन पत्र पेश गरेकोप्रति पनि आयोगको ध्यानाकर्षण भएको छ।’

आयोगले सरकारलाई चिकित्सा शिक्षा जस्तो आधारभूत मानव अधिकारको विषयप्रति संवेदनशील हुन आग्रहसमेत गरेको छ। ‘डा. केसीसँग नेपाल सरकारले विगतमा पटक–पटक गरेका सम्झौताहरूप्रति गम्भीर हुँदै उहाँको जीवन रक्षाका लागि हरसम्भव प्रयास गर्न तथा विगतमा भएका सम्झौतहरुको कार्यान्वयन स्थिति सार्वजनिक गर्न पनि आयोग नेपाल सरकारको ध्यानाकर्षण गराउँछ’, आयोगका सचिव तथा प्रवक्ता वेद भट्टराईले भनेका छन्।

आपसी विमतिका विषयहरु वार्ता र संवादको माध्यमबाट समाधान गर्नु पर्ने आयोगकाे ठहर छ । आमरण अनसन जस्तो जीवन नै जोखिममा पर्नसक्ने जटील विकल्प नरोज्न पनि आयोगले केसीलाई आग्रह गरेको छ।