आईपीएल: मुम्बईलाई हराउँदै चेन्नईको विजयी सुरुवात

आईपीएल: मुम्बईलाई हराउँदै चेन्नईको विजयी सुरुवात

एजेन्सी । इन्डियन प्रिमियर लिग 'आइपिएल' सिजन २०२० को पहिलो खेलमा चेन्नई सुपर किंग्सले मुम्बई इन्डियन्सलाई ५ विकेटले पराजित गरेकाे छ । जितका लागि १ सय ६३ रनको विजयी लक्ष्य पछ्याएको चेन्नईले १९.२ ओभरमा ५ विकेटको क्षतिमा पुरा गर्दै विजयी सुरुवात गरेको हो ।

चेन्नईका लागि अंबाती राएडुले अर्धशतकिय पारी खेले । ४८ बल खेलका उनले ६ चौका र ३ छक्काको सहयोगमा ७१ रन बनाए । त्यस्तै फाप डु प्लेसिसले ५८ रनको अर्धशतकीय पारी खेले । ४४ बल खेल्दै उनले ६ चौकाको सहयोगमा ५८ रन बनाउन सफल भए । 

चेन्नईका लागि श्याम करनले १८ रन जोड्दा रविन्द्र जडेजाले १० रन बनाए । बलिङतर्फ मुम्बइका लागि ट्रेन्ट बोट, जेम्स प्याटिन्सन, जसप्रीत बुमराह, कुनाल पाड्या र राहुल चाहरले समान एक–एक विकेट लिए ।  

यसअघि टस हारेर पहिले ब्याटिङ गरेको मुम्बईले निर्धारित २० ओभरमा ९ विकेट गुमाउँदै १६२ रन बनाएको थियो । मुम्बईका लागि सौरभ तिवारीले सर्वाधिक ४२ रनको योगदान गरे । ३१ बल खेलेका तिवारीले ३ चौका र १ छक्काको सहयोगमा ४२ रन बनाउन सफल भएका हुन् । 

त्यस्तै ओपनिङमा आएका क्विन्टन डि ककले ३३ रन बनाए । मुम्बईका लागि केइरन पोलार्डले १८ रन बनाउँदा सुर्यकुमार यादवले १७, हार्दिक पाड्या १४ र कप्तान रोहित शर्मा १२ रनको योगदान गरे । 

बलिङतर्फ चेन्नाइका लागि लुंगी एन्गिडिले सर्वाधिक तीन विकेट लिए । त्यस्तै रविन्द्र जडेजा र दीपक चहारले समान दुई–दुई विकेट लिए । चेन्नईका लागि श्याम करन, प्रियुस चहालले समान एक–एक विकेट लिए ।