शनिबार, जेष्ठ २४, २०७७
    स्वास्थ्य

    शनिबार थपिए ६८ जना कोरोना संक्रमित, कुन प्रदेशमा कति संक्रमित ?

    शनिबार, १० जेष्ठ २०७७, आहाखबर

    काठमाडौं। नेपालमा शनिबार मात्र थप ६८ जनामा कोरोना भाइरस संक्रमण देखिएको छ। स्वास्थ्य तथा जनसंख्या मन्त्रालयले दुई चरणमा सार्वजनिक गरेको विवरण अनुसार एकैदिन ६८ जना नयाँ संक्रमण पुष्टि भएको हो। शनिबार बिहान मात्र ३२ जनामा कोरोना संक्रमण देखिएको थियो। शनिबार दिउँसो थप ३६ जनामा कोरोना पुष्टि भएको हो।

    मन्त्रालयका अनुसार आज बाँके, बर्दिया, सुर्खेत, बैतडी, कपिलवस्तु, झापा, सर्लाही, बारा, काठमाडौं, रूपन्देही  र चितवनमा संक्रमित थपिएका हुन्। नियमित पत्रकार सम्मेलनमा स्वास्थ्य मन्त्रालयका प्रवक्ता डा विकास देवकोटाका अनुसार नेपालमा कोरोना सङ्क्रमितको सङ्ख्या ५८४ पुगेको छ।

    नेपालमा हालसम्म तीनजना संक्रमितको मृत्यु भइसकेको छ। सिन्धुपाल्चोक, बाँके र पाल्पा गरेर तीनजनाको कोरोना संक्रमणबाट मृत्यु भएको हो। आजसम्म ७० जना निको भएर घर फर्किएका छन्। पछिल्ला दिनका कोरोना भाइरसबाट सङ्क्रमण हुनेको सङ्ख्यामा वृद्धि भएको छ। हालसम्म कूल ४० जिल्लामा कोरोना सङ्क्रमित भएका छन्।

    हाल संक्रमित पुष्टि भएका मध्ये प्रदेश १ मा ६० जना,  प्रदेश २ मा १५७, बाग्मतीमा २२, गण्डकीमा ३, प्रदेश नम्बर ५ मा २४७, कर्णाली प्रदेशमा ४ र सुदूरपश्चिममा ९ जना गरेर ५०२ जनाको आइसोलेसनमा उपचार भइरहेको छ। यस्तै, मन्त्रालयका अनुसार प्रदेश नं १ मा ८६, प्रदेश नं २ मा १७२, वाग्मती प्रदेशमा ३२ जना सङ्क्रमित भएका छन्। यस्तै गण्डकी प्रदेशमा पाँच, प्रदेश नं ५ मा २७१, कर्णाली प्रदेशमा चार र सुदूरपश्चिम प्रदेशमा १४ जना सङ्क्रमित भएका छन्।

    स्वास्थ्य तथा जनसंख्या मन्त्रालयका अनुसार हालसम्म पीसीआर विधिबाट देशैभर ४५ हजार ९५७ नमूना परीक्षण भएका छन्। त्यस्तै आरडीटी किट विधिबाट ८६ हजार २३५ नमूना परीक्षण भएका छन्। पछिल्लो २४ घण्टामा ३ हजार ४९४ पीसीआर विधिबाट र आरडीटी विधिबाट ४ हजार ११९ नमूना परीक्षण भएका छन्।

    देशैभर आजसम्म क्वारेन्टाइनमा ३२ हजार ५८७ जना रहेका छन्। प्रदेश १ मा एक हजार ४६१, प्रदेश २ मा ६ हजार ९१०, बाग्मतीमा ५३५, गण्डकीमा ७७९, प्रदेश ५ मा १७ हजार १३०, कर्णाली प्रदेशमा १ हजार ६७० र सुदूरपश्चिम प्रदेशमा ४ हजार १०२ रहेका छन्।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast