शनिबार, जेष्ठ २४, २०७७
    राज्य-समाज

    गृह मन्त्रालयले गर्‍याे उपत्यका प्रवेश निषेध

    शुक्रबार, ९ जेष्ठ २०७७, आहाखबर
    फाइल फाेटाे

    काठमाडौं, ८ जेठ । गृह मन्त्रालयले अत्यावश्यक कामबाहेक काठमाडौं उपत्यका प्रवेशमा निषेध गर्ने निर्णय गर्दै उपत्यकाका सबै स्थानीय तहलाई निर्णय कार्यान्वयन गर्न परिपत्र गरेको छ । उपत्यकाका स्थानीय तहका प्रमुखसहितको छलफलपछि गृह मन्त्रालयले उपत्यका छिर्ने सबै नाका सिल गर्न र जथाभावी हुने प्रवेश रोक्न भन्दै स्थानीय तहलाई निर्णय कार्यान्वयनका लागि परिपत्र गरेको हो ।

    लकडाउनमा मानिसहरू विभिन्न बहानामा उपत्यकाबाट बाहिरिने र भित्रने क्रम नरोकिएपछि उपत्यकामा बढी जोखिम देखिएको भन्दै गृहले अत्यावश्यकबाहेक प्रवेश निषेध गर्ने र उपत्यका भित्रने सबै नाका सिल गर्ने निर्णय गरेको हो । गृहको निर्देशनमा अत्यावश्यक काम परेर आउनैपर्ने भए प्रवेशपूर्व नै आरडीटी परीक्षण गरी रिपोर्टका साथ प्रवेशका लागि अनुमति माग गर्न सकिने भनिएको छ ।

    ‘काठमाडौं उपत्यकामा अत्यावश्यक काममा प्रवेश गर्नुपर्ने कुनै व्यक्तिले उपत्यका प्रवेशपूर्व नै आफ्नै खर्चमा उपलब्ध भएसम्म आरडीटी परीक्षण गरी सोको रिपोर्टसहित काठमाडौं उपत्यका प्रवेश अनुमतिका लागि माग गर्ने,’ गृह मन्त्रालयअन्तर्गत शान्ति सुरक्षा तथा अपराध नियन्त्रण शाखाद्वारा जारी विज्ञप्तिमा भनिएको छ ।

    गृह प्रवक्ता केदारनाथ शर्माले बिनाकाम मानिसको ‘मोबिलिटी’ बढेको भन्दै लकडाउन पालनाका लागि नै उपत्यका प्रवेश गर्नेलाई रिपोर्ट अनिवार्य भनिएको बताए । तर, एम्बुलेन्समा आउने बिरामीका लागि भने यो लागू हुनेछैन । ‘बिनाकाम मोबिलिटी बढ्यो, एक जिल्लाबाट अर्को जिल्लामा जाँदा पनि जानुपर्ने जिल्लाका सीडीओसँग अनुमति लिनुपर्छ । अब त्यसरी जाँदा रिपोर्ट पनि अनिवार्य भनिएको हो,’ गृह प्रवक्ता शर्माले भने ।

    गृहले स्थानीय तहका लागि पठाएको पत्रमा काठमाडौं उपत्यका प्रवेश बिन्दुमा आइपुग्ने सवारी साधनहरू प्रवेश बिन्दुमा पुग्नुपूर्व नै सुरु प्रस्थान जिल्लामा नै सुरक्षा निकायलाई विशेष निगरानीका साथ रोक्न र आगमनमा कडाइ गर्न भनिएको जनाएको छ ।

    काठमाडौं उपत्यका भित्रिएका व्यक्तिको सही पहिचान गरी आरटी–पीसीआर प्रविधिबाट कोरोना परीक्षणको दायरा यथाशीघ्र तीव्र गतिमा बढाउनुपर्छ । त्यसका लागि सम्बन्धित वडाले क्रियाशीलता देखाउन आवश्यक छ । परीक्षण जति फराकिलो बनाइयो, केसहरू पत्ता लगाउन सजिलो हुन्छ
    प्राडा. जीवनबहादुर शेरचन,
    संक्रामक तथा सरुवा रोग अनुसन्धान विशेषज्ञ

    पत्रमा उपत्यका प्रवेशका सबै नाकाहरू अत्यावश्यक प्रयोजनबाहेक पूर्ण रूपमा सिल गर्न र लुकीछिपी हुने प्रवेशलाई समेत पूर्ण रूपमा रोक्न भनिएको छ । मन्त्रालयले उपत्यकाका सबै स्थानीय तहहरूमा पठाएको पत्रमा जनप्रतिनिधिसहितको छलफलपछि सो निर्णय गरिएको र कार्यान्वयनमा ल्याउन भनिएको छ ।

    गत १ जेठमा गृहमन्त्री रामबहादुर थापासहित उपत्यकाका नाका पर्ने सबै स्थानीय तहका प्रमुख र सुरक्षा निकायका प्रमुखबीच सो विषयमा छलफल भएको थियो भने स्थानीय तहका प्रमुखले बढ्दो क्रममा रहेको उपत्यका प्रवेश रोक्न र सबै नाका सिल गर्ने गरी निर्णय लिन गृहमन्त्रीलाई आग्रह गरेका थिए ।

    गृहको निर्देशनमा उपत्यकाका सबै स्थानीय तहले स्थानीय प्रशासनसँग समन्वय गरी आ–आफ्नो क्षेत्रमा रहेका होटल, पार्टी प्यालेस, सामुदायिक भवन र अन्य सम्भाव्य स्थललाई क्वारेन्टाइन बस्ने व्यक्ति स्वयंले क्वारेन्टाइन खर्च भुक्तानी गर्ने गरी सम्भावित क्वारेन्टाइन प्रयोजनका लागि लागत संकलन र अन्य व्यवस्थापनको कार्य अगाडि बढाउन भनिएको छ ।

    यस्तै, स्थानीय संघसंस्था र क्लबले गरिरहेको सामूहिक राहत वितरण र खाना वितरणले भीडभाड बढ्न गई जोखिम बढाएकाले सो कार्य स्थानीय तहसँग समन्वय नभएमा रोक्न र समन्वय गरी स्वास्थ्यसम्बन्धी प्रोटोकल पालना गरी वितरण गर्न पनि भनिएको छ ।

    गृहमन्त्री थापाको अध्यक्षतामा १ जेठमा बसेको बैठकमा उपत्यका नगरपालिका फोरमका पदाधिकारी, उपत्यकाको नाकासँग जोडिएका स्थानीय तहका प्रमुख, उपप्रमुख, उपत्यकाका प्रमुख जिल्ला अधिकारी र सुरक्षा निकायका प्रमुख सहभागी थिए ।राजधानी दैनिकबाट

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast