शुक्रबार, जेष्ठ १६, २०७७
    राज्य-समाज

    भारतले भन्यो–नेपालले जारी गरेको नक्शा अस्वीकार्य

    बुधबार, ७ जेष्ठ २०७७, आहाखबर

    काठमाडौं, जेठ । नेपालले बुधबार सार्वजनिक गरेको नयाँ राजनीतिक तथा प्रशासनिक नक्शाप्रति भारतले आपत्ति जनाएको छ ।

    भारतीय विदेश मन्त्रालयका प्रवक्ता अनुराग श्रीवास्तवले भने, ‘नेपालले सार्वजनिक गरेको संशोधित नक्शामा भारतीय भूभाग समेटिएको छ । नेपालले गरेका एकतर्फी कार्य कुनै ऐतिहासिक तथ्य र प्रमाणमा आधारित छैन ।’

    भूभागको यस्तो कृतिम विस्तारलाई भारतले स्वीकार नगर्नेसमेत विज्ञप्तिमा भनिएको छ । यो कार्य सीमा विवादलाई द्विपक्षीय कूटनीतिक वार्ताका माध्यमद्वारा हल गर्ने पूर्व प्रतिबद्धताको पनि विपरीत भएको विज्ञप्तिमा उल्लेख छ ।

    यो विषयमा भारतको पहिलेदेखिको स्थिर अडानबारे नेपाललाई जानकारी भएको पनि जनाइएको छ ।

    विज्ञप्तिमा भनिएको छ, ‘हामी नेपाल सरकारलाई भारतको सार्वभौमसत्ता र भौगोलिक अखण्डताको सम्मान गर्न आग्रह गर्दछौं । साथै सीमा मामिलाको समाधान गर्नका लागि नेपालको राजनीतिक नेतृत्वले सकारात्मक वातावरण बनाउने भारतले आशा राखेको छ ।’

    भारतले नोभेम्बरमा यसरी नै एकपक्षीय रुपमा नयाँ राजनीतिक नक्शा जारी गरेको थियो । नेपाली भूभागलाई समेटेर नक्शा जारी गरेको भन्दै नेपालले विरोध गर्नुका साथै कूटनीतिक नोट पठाएको थियो ।

    कुनै वार्ता र संवाद नगरी भारतले उल्टै नेपालको लिपुलेक हुँदै चीनको मानसरोवर जाने सडक मार्गको उद्घाटन गरेपछि नेपाले पनि भारतले अतिक्रमण गरेको जमीन समेटेर नक्शा सार्वजनक गरेको हो ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast