शनिबार, जेष्ठ २४, २०७७
    आर्थिक खबर

    गिरफ्तार हुनुपरे आफू तयार रहेको टेस्ला प्रमुख मस्कको भनाइ

    बुधबार, ३१ बैशाख २०७७, आहाखबर

    अमेरिकी विद्युतीय कार निर्माता कम्पनी टेस्लाका कार्यकारी प्रमुख एलन मस्कले जारी लकडाउनमा बन्द गर्नुपर्ने आदेशकाबीच कम्पनी खोल्ने घोषणा गरेका छन्।
    उनले यसका लागि यदि कोही पक्राउ हुनुपरे त्यो व्यक्ति आफूमात्रै हुने बताएका छन्।
    टेस्लाको अमेरिकामा रहेको एक मात्र गाडी उत्पादन प्लान्ट क्यालिफोर्निया राज्यमा छ। कोरोना भाइरसका कारण राज्यमा लकडाउन जारी रहेकाले कुनै पनि कम्पनीलाई काम सुरू गर्ने अनुमति हाललाई छैन।
    टेस्लाको यो कदम अमेरिकाका अन्य राज्यले पुनः अर्थव्यवस्थालाई सामान्यतर्फ फर्किने प्रयासकाबीच आएको हो।


    मस्कले कम्पनीलाई काम सुरू गर्नबाट रोकिए फ्याक्ट्रीलाई टेक्सस वा नेभाडा सार्ने धम्की यसै सप्ताहन्तमा दिइसकेका छन्।
    उनको यो कदमले काममा रहेको प्रतिष्पर्धालाई उजागर गरेको छ। राष्ट्रपति डोनाल्ड ट्रम्पले दिएको प्रोत्सहानका कारण अन्य राज्यका अर्बपति कार्यकारीहरू यति बेला अर्थव्यवस्था खोल्न हतारिएका छन्।
    सोमबारको एक इमेलमा टेस्लाले बिहीबार क्यालिफोर्नियाका गभर्नरले निर्माण कम्पनीलाई पुनः काम सुरू गर्न अनुमति दिएको र आइतबारसम्म सबै कर्मचारी काममा फर्किने जनाएको छ।
    ‘हामी काममा फर्किन पाउँदा खुसी छौं र हामीले तपाईंहरू काममा फर्किँदा तपाईंहरूको सुरक्षाका लागि विस्तृत सुरक्षा योजना बनाएका छौं,’ रोयटर्सले हेरेको इमेलमा भनिएको छ।

    यसैगरी मस्कले एक ट्वीटमा सोमबारबाट काम सुरू भइसक्ने र कामदारहरूसँग निर्माणस्थलमा आफू पनि जोडिने बताएका छन्।
    ‘यदी कोही पक्राउ हुनेछ भने मैले त्यो व्यक्ति म मात्रै हुनुपर्ने भन्नेछु,’ उनले ट्वीटमा भनेका छन्।
    टेस्लाको कारखाना रहेको अलमेडा काउन्टीले सोमबार अबेर आफूहरूलाई टेस्ला कम्पनी खुलेको जानकारी भएको र उसलाई काउन्टीको योजना अनुमतिबिना त्यसो गर्ने अनुमति नभएको सूचना दिइसकिएको जनाएको छ।
    एक विज्ञप्तिमा काउन्टीले सोमबारपछि उनीहरूले यसबारेमा टेस्लाबाट प्रस्तावको आशा गरिरहेको जनाएको छ।
    ‘आशा छ टेस्लाले त्यस्तै थप कार्यान्वयनको उपाय पछ्याउने छ,’ विज्ञप्तिमा भनिएको छ।
    यद्यपी उसले त्यसका परिणाम के हुनेछन् भन्ने बारेमा त्यसमा विस्तृत केही खुलाएको छैन। काउन्टीका अधिकारीले पनि यसमा थप टिप्पणी दिन अस्वीकार गरेका छन्।
    काउन्टीको लकडाउन आदेशमा आदेशको बर्खिलाप गरे जरिमाना वा जेल सजाय वा दुबै सजाय हुनसक्ने प्रावधान छ।
    फ्रिमोन्ट पुलिस विभागकी प्रवक्ताले आफूहरू त्यहाँको स्वास्थ्य विभागको निर्देशनअनुसार लकडाउन कार्यान्वयन गराउनेमा रहेको र टेस्लाको सवालमा काउन्टी आफैंले प्रत्यक्ष काम गरिरहेको बताएकी छन्।
    यसैगरी सोमबार अमेरिकी कोषका सचिव स्टिभन मनचिनले क्यालिफोर्नियाले टेस्ला त्यही रहिरहोस् भन्ने चाहन्छ भने पुनः काम सुरू गर्न दिन जेसक्छ त्यो गर्नुपर्ने बताएका थिए।
    क्यालिफोर्नियाका गभर्नर गाभिन न्यूसोमले सोमबार आफूले कयौं दिन अगाडि मस्कसँग कुरा गरेको र टेस्लाका संस्थापकको चिन्ताले आफूहरूलाई उत्पादन पुनः खोल्न सहयोग गरेको बताए।
    ‘मैले सो कम्पनीलाई मात्र होइन, उसको संस्थापकलाई पनि वर्षौंवर्षदेखि चिनेको छु,’ आफ्नो नियमित कोरोना भाइरसको प्रेस ब्रिफिङमा न्यूसोमले भने, ‘मसँग उनीहरूको प्रविधि, नवीन सोच र नेतृत्वप्रति ठूलो सम्मान छ।’
    टेस्लाको गाडी उत्पादन प्लान्ट अमेरिकाका अलावा चीनको सांघाइमा छ भने अर्को एक प्लान्ट बर्लिनमा बनाइरहेको छ।
    कम्पनीले शनिबार काउन्टीले उनीहरूको कारखाना पुनः संचालन गर्न पाउनुपर्ने क्यालिफोर्नियाको संविधानको उल्लंघन गर्दै न्यूसोमको आदेशको पालना नभएको भन्दै मुद्दा दायर गरेको छ।
    मस्कले यसअघि क्यालिफोर्निया बाहिरपनि गाडी निर्माण गर्ने अर्को प्लान्ट स्थापना गर्ने बारेमा छलफल गरेका थिए।
    गत फेब्रुअरीमा उनले टेक्ससमा अर्को प्लान्ट खोल्न सकिने सम्भावनाका बारेमा बताएका थिए।
    मस्कले शनिबार क्यालिफोर्निया छोड्ने धम्की दिएसँगै टेक्सस, जर्जिया, ओक्लोहामा, उटाह र नेभाडा राज्यका अधिकारीहरूले उनको ट्वीटमा कम्पनीलाई आफ्नो राज्यमा स्थानन्तरण गर्न प्रोत्साहित गरेका छन्।
    टेक्ससका एक अधिकारीले आफ्नो काउन्टी टेस्लालाई तत्काल स्थापना गर्न दिन तयार रहेको बताउँदै अर्बपति प्रमुख कार्यकारीलाई आफ्नो ठाउँको भ्रमण गर्ने निम्तो दिएका छन्।
    ‘हामीसँग व्यापार मैत्री र त्यसलाई प्रोत्साहित गर्ने गभर्नर छन्,’ टेक्ससको हिडाल्गो काउन्टीका न्यायाधीश रिचार्ड कोर्टेजले सोमबार भने।
    यसको प्रतिउत्तरमा मस्कले सो प्रस्तावका लागि ट्वीटमै आभार प्रकट गरेका छन्।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast