शनिबार, जेष्ठ २४, २०७७
    आर्थिक खबर

    नेपाली उत्पादनले धानेपछि घट्यो भारतिय तरकारीको आयात

    शुक्रबार, १९ बैशाख २०७७, आहाखबर

    काठमाडौं, १९ वैशाख । गत चैत ११ गतेदेखि जारी लकडाउनले आर्थिक गतिविधिका काम ठप्प छन् । दैनिक आवश्यकता पर्ने तरकारी कृषकहरुले बजारसम्म पुर्याउन नपाउँदा समस्यामा परेका छन् । उपत्यकामा मानिसहरुको चाप पनि कम भएको छ । तर तरकारी उत्पादन भने बढेर यतिबेला बजार पाउन सकेको छैन ।

    लकडाउनका कारण पछिल्लो एक महिना यता भारतीय तरकारीको आयात केही घटेको छ । यतिबेला कालिमाटी तरकारी बजारमा उपभोक्ताले माग गरेको २० प्रतिशत मात्र तरकारी भारतबाट आयात भइरहेको र बाँकी ८० प्रतिशत स्वदेशी उत्पादनले बजार धानेको कालिमाटी फलफूल तथा तरकारी बजार विकास समितिका सूचना अधिकृत विनय श्रेष्ठले बताए ।


    उनका अनुसार लकडाउनपछि भारतबाट कागती, प्याज र गोलभेंडा मात्र ल्याउने गरिएको छ भने बोडी, सिमी, काउली, भन्टा, बन्दाकोभी लगायतका मौसमी तरकारीहरु अहिले बजारमा नेपालमै उत्पादित आउन थालेका छन् । उनले भने, नेपाली उत्पादन बजारमा आउन थालेसँगै गत साताको तुलनामा आज भोली तरकारीको मूल्य घटेर थोक मूल्य समेत केही दिन यता न्यून विन्दुमा झरेको छ।

    लकडाउनले बजारमा स्वदेशी उत्पादन आउन थालेपछि काठमाडौंमा तरकारी सस्तिएको र नेपालकै उत्पादनले बजार धान्न थालेकाले पनि भारतबाट आयात कम हुन थालेको श्रेष्ठको भनाइ छ । कालिमाटी तरकारी बजारमा यतिबेला स्वदेशी उत्पादन र भारतबाट आयातितसहित दैनिक पाँच सय टन तरकारी भित्रिरहेको छ । लकडाउन पहिले दैनिक आठ सय टन तरकारी आउने गरेको समितिले जनाएको छ।

    कालिमाटी फलफूल तथा तरकारी विकास समितिको आजको मूल्यसूचि अनुसार गोलभेंडा २८ रुपैयाँ, घिरौंला र फर्सी ३८ रुपैयाँ, मुला १२ रुपैयाँ, भन्टा २९ रुपैयाँ, आलु ३२ रुपैयाँ, प्याज २९ रुपैयाँ, गाँजर २८ रुपैयाँ, काउली २२ रुपैयाँ, घिउसिमी २८ रुपैयाँ प्रतिकेजी रहेको छ।

    अहिले तरकारी उत्पादन हुने समय भएकाले र लकडाउनले अधिकांश पसलहरु बन्द भएकाले खरिदबिक्रीमा केही कमि आएको छ । तर उपत्यकाबाट धेरै मानिस बाहिर गएकाले पनि तरकारीको खपत घटेको श्रेष्ठले बताए । कोरोना भाइरसको महामारी फैलन थालेपछि कालिमाटी फलफूल तथा तरकारी बजार विकास समितिले भीडभाड कम गर्न खुद्रा व्यापार बन्द गरी बिहानको समयमा थोक व्यापार गरिरहेको छ।

    त्यस्तै, अहिले महानगर, वडा र युवा समितिहरुले महानगरभित्र घुम्ती सेवामार्फत चोकचोकमा पुगेर तरकारी विक्रि गरेकाले तरकारीको थोक खरिद बढेको श्रेष्ठले जनाएका छन् । महानगरले कालिमाटीमा भिडभाड कम गर्न भन्दै महानगरभित्र थप १० स्थानबाट अस्थायी तरकारी बजार व्यवस्थापन गरेको छ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast