शनिबार, जेष्ठ २४, २०७७
    राज्य-समाज

    आन्तरिक उडान खोल्ने तयारी

    शनिबार, १३ बैशाख २०७७, आहाखबर

    कोरोना संक्रमण जोखिम रोकथामका लागि लकडाउन लम्बिँदै जाँदा अर्थतन्त्रमा नकारात्मक प्रभाव पर्ने भएपछि सरकारले आन्तरिक उडानमा मापदण्ड बनाएर खोल्ने तयारी गरेको छ । 
    नागरिक उड्डयन प्राधिकरणका महानिर्देशक राजन पोखरेलका अनुसार कोरोनाको जोखिम कम हुँदै जाँदा लकडाउनलगायत उडानसमेत खुला गर्दा अपनाउनुपर्ने मापदण्डबारे छलफल भइरहेको जानकारी दिए । प्राधिकरणले पर्यटन मन्त्रालय, स्वास्थ्य सेवा विभाग र वायुसेवा सञ्चालक संघको समन्वयमा मापदण्ड तयार गर्न लागेको छ । आन्तरिक उडान खुला गर्ने मिति भने तय भइसकेको छैन । तैपनि, आन्तरिक उडानलाई कसरी व्यवस्थापन गर्ने भन्ने विषयमा छलफल भइरहेको पोखरेलले बताए ।
    पाइलट, इन्जिनियर, एयर ट्राफिक कन्ट्रोलरसहितको लाइसेन्स नवीकरणको समय थप गरिएको छ । नियामक निकाय नागरिक उड्डयन प्राधिकरणले मे महिनाभरि नवीकरणको समय थप गरेको हो । 
    अन्तर्राष्ट्रिय नागरिक उड्डयन संगठन (आइकाओ)सँगको समन्वयमा नवीकरणको समय थप गरिएको प्राधिकरणका महानिर्देशक पोखरेलले जानकारी दिए । लाइसेन्स नवीकरणका लागि पाइलटले वर्षमा दुईपटक सिमुलेटर तालिममा जानुपर्ने व्यवस्था छ । वर्षमा एकपटक मेडिकल लाइसेन्स नवीकरण गर्नुपर्ने प्रावधान छ ।  
    नेपालमा लाइसेन्स लिएका पाइलटहरू ३ सयभन्दा बढी छन् । इन्जिनियरको संख्या पनि ३ सयभन्दा बढी छ । ‘सबै उड्डयन क्षेत्रमा काम गर्ने जनशक्तिको लाइसेन्स नवीकरणको समय थप गरिएको हो,’ पोखरेलले भने । लकडाउन लम्बिँदै गएमा नवीकरणको समय पनि थप गर्दै जाने पोखरेलले जानकारी दिए ।
     
    पाइलट, एयरहोस्टेज, मेडिकल, तालिम, प्राविधिक इन्जिनियरलगायत विभिन्न विभागका जनशक्तिको लाइसेन्स नवीकरण गर्नका लागि नेपाल वायुसेवा निगम, हिमालय एयरलाइन्स, बुद्ध एयर, यती एयरलाइन्स, तारा एयर र समिट एयरलगायत कम्पनीले नवीकरणको समय थप गर्न माग गरेका थिए ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast