बिहिवार, आषाढ २५, २०७७
    राज्य-समाज

    मंगलबारबाट खुल्ने ५ दिनका लागि बन्द भएकाे नेपाली सेयर बजार

    बिहिवार, १३ चैत्र २०७६, आहाखबर

    काठमाडौं, १३ चैत । गत सोमबारबाट बन्द भएकाे सेयर कारोबार आगामी मंगलबारबाट खुल्ने भएको छ । सरकारले यहि आइतबारबाट अत्यावश्यकबाहेकको सेवा बन्द गर्ने निर्णय गरेपछि आइतबार नेपाल स्टक एकचेञ्ज 'नेप्स' ले लगानीकर्ताको विरोधका बाबजुत सेयर कारोबार खोल्ने  निर्णय गरेको थियो ।

    तर, नेपाल धितोपत्र बोर्डले धितोपत्र ऐनमा रहेको विशेष अधिकारको प्रयोग गर्दै सोमबारबाट पाँच दिनको लागि सेयर कारोबार बन्द गर्ने निर्णय गरेको थियो । 

    आगामी सोमबारबाट उक्त पाँचदिनको समय सकिने भएकोले परिस्थिति अहिलेकै अवस्थामा रहने हो र सरकारले अर्को कुनै निर्णय नगर्ने हो भने सेयर कारोबार खुल्ने नेपाल धितोपत्र बोर्डका कार्यकारी निर्देशक निरज गिरीले बताए । 

    बोर्डले धितोपत्र सम्बन्धी ऐनको दफा ९०, उपदफा १ को घ लाई प्रयोग गर्दै ५ कारोबार दिनको लागि सेयर बजार बन्द गर्ने निर्णय गरेको थियो । 

    उक्त दफामा बोर्डको विशेष अधिकारको रुपमा ‘धितोपत्र बजारसँग परामर्श गरी बढीमा पाँच दिनसम्मका लागि धितोपत्र बजार बन्द गर्न आदेश दिने’ उल्लेख छ । 

    ऐनको उक्त व्यवस्थाअनुसार पनि बोर्डले पाँचदिन भन्दा बढी सेयर बजार बन्द गर्न सक्ने अवस्था देखिँदैन । 

    यता बुधबार बसेको अर्थमन्त्री संयोजक रहेको उच्च स्तरीय वित्तीय क्षेत्र व्यवस्थापन समन्वय समितिको बैंठकले पनि बैंकिङ, बीमा, धितोपत्र, कम्पनी दर्ता र बचत तथा ऋण परिचालन सम्बन्धि न्यूनतम सेवाहरुलाई सम्बन्धित निकायहरुले निरन्तरता दिने निर्णय गरेको छ । 

    समितिको निर्णयको पहिलो बुँदामा नै ‘विश्वव्यापी रुपमा फैलिएको कोभिड–१९ संक्रमणबाट सजग रहन र सतर्कता अपनाइ बैंकिङ, बीमा, धितोपत्र, कम्पनी दर्ता र बचत तथा ऋण परिचालन सम्बन्धि न्यूनतम सेवाहरुलाई सम्बन्धित निकायहरुले निरन्तरता दिने । साथै कुन–कुन सेवा कुन क्षेत्रबाट दिने हो, सोको सञ्चार माध्यमबाट सेवाग्राहीलाई जानकारी गराउने’ उल्लेख छ । 

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast