आईतवार, जेष्ठ १८, २०७७
    बैंक-बीमा

    अर्थमन्त्री खतिवडाले ताेके चिन्तामणि शिवाकोटीलाई राष्ट्र बैंकका कामु गभर्नर

    बुधबार, ५ चैत्र २०७६, आहाखबर

    काठमाडौं, ५ चैत । नेपाल राष्ट्र बैंकको कायम मुकायम गभर्नरको जिम्मेवारी चिन्तामणि शिवाकोटीले पाएका छन् । 

    मंगलबार अर्थमन्त्री डा. युवराज खतिवडाले अर्को व्यवस्था नभएसम्मका लागि शिवाकोटीलाई कायम मुकायम गभर्नरको जिम्मेवारी दिएका हुन् । २०७१ साल चैत ५ गते गभर्नरको नियुक्ति पाएका चिरञ्जीबि नेपालको कार्यकाल मंगलबार सकिएपछि शिवाकोटीलाई सो जिम्मेवारी दिइएको हो । यसअघि गभर्नरको कार्यकाल नसिकँदै नयाँ नियुक्ति हुने गथ्र्यो । 

    यस पटक राष्ट्र प्रमुख नै विरामी परेपछि गभर्नर नियुक्ति हुन सकेको थिएन । नयाँ गभर्नरको नियुक्ति हुन नसकेपछि शिवाकोटीलाई नयाँ व्यवस्था नहन्जेलसम्म कामु गभर्नर तोकिएको हो । गभर्नर विदेश जाँदा, बिदामा बस्दा वा अन्य कारणले विदामा बस्दा समेत कायम मुकायम गभर्नरको जिम्मेवारी अर्थमन्त्रीको निर्णयमा वरिष्ठ डेपुटी गभर्नरलाई तोक्ने प्रचलन थियो । 

    यही अनुसार शिवाकोटीले गभर्नर नेपाल विदेश जाँदा करिब २५ पटकसम्म यस्तो जिम्मेवारी पाइसकेका छन् । गभर्नरको अवकाशपछिको यो जिम्मेवारीको प्रकृति सोही किसिमको हुने भए पनि यो जिम्मेवारीलाई यसअघिको जिम्मेवारी भन्दा केही विशेष मानिन्छ । 

    यो जिम्मेवारी प्राप्त गर्नेले पूर्णकालीन रुपमा नियुक्त हुने गभर्नरले जत्तिकै काम गर्न पाउँछन् कि पाउँदैनन् भन्ने सम्बन्धमा हालसम्म कुनै पनि कानूनी व्यवस्था छैन । यसमा निर्णयको आवश्यकता र स्वविवेक प्रधान हुने जानकारहरु बताउँछन् । यसअघि कृष्णबहादुर मानन्धरले कामु गभर्नर भएकै अवस्थामा नोटमा हस्ताक्षर समेत गरेका थिए ।

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast