मंगलवार, चैत्र १८, २०७६
    खेल संसार

    पुवुदुको आगमनले भैरहवा ग्लाडिएटर्स उत्साहित

    आईतवार, १८ फागुन २०७६, आहाखबर

    काठमाडौं, १८ फागुन

    एभरेष्ट प्रिमियर लिग (ईपीएल) टी २० मा दुई पटकको उपविजेता भैरहवा ग्लाडिएटर्स यस पटक पुवुदु दासानायकेको आगमनबाट उत्साहित बनेको छ ।

    पुवुदु तिनै प्रशिक्षक हुन् जसले नेपाललाई टी २० विश्वकपसम्म पुर्‍याएका थिए । उनले सन् २०११ देखि २०१५ सम्म नेपाली राष्ट्रिय टिमको प्रशिक्षण सम्हालेका थिए ।

    अहिले भैरहवाले तिनै पुवुदुलाई प्रशिक्षक बनाएर ईपीएल २०२० मा खेल्न लागेको हो ।

    आयोजक ईपीएल प्रालिले ईपीएललाई अझ ठूलो र विश्वभर चर्चित बनाउन विश्वकै चर्चित खेलाडीलाई भित्र्याउने प्रयासलाई यसपटक सफल बनाएको छ । पोखरा राइनोजले वेष्ट इन्डिजका विष्फोटक ब्याट्सम्यान क्रिस गेललाई अनुबन्ध गरिसकेको छ । भैरहवाले वेष्ट इन्डिजका अर्का खेलाडी ड्वाने स्मिथलाई अनुबन्ध गरिसकेको छ ।

    सन् २०१७ र २०१८ मा भैहरवा फाइनल पुगे पनि पराजित हुँदै उपाधिबाट बन्चित भएको थियो ।

    ई्पीएलमा सहभागी फ्रेन्चाइजले ४ जनासम्म विदेशी खेलाडी राख्न पाउनेछन् भने ३ विदेशी अनिवार्य राख्नुपर्नेछ । त्यही अनुसार भैरहवाले आइतबार प्रशिक्षक दासानायकेसंगै अरु तीन विदेशी खेलाडीको नाम समेत सार्वजनिक गरेको छ ।

    कार्यक्रममा पुवुदुले फेरि नेपाल आउन पाउँदा उत्साहित भएको बताए । ‘एकदमै अनौठो अनुभव भइरहेको छ’ पुवुदुले भैरहवाको प्रशिक्षकको रुपमा नेपाल आएपछि भने ‘नेपाल फेरि आउन पाउँदा खुशी छु । मैले अवसर पाएको छु । ईपीएलललाई लिएर उत्सहित छु ।’

    पुवुदुलुले आफूलाई विश्वास गरेकोमा भैरहवालाई धन्यावद दिए।

    यस्तै भैरहवाका मालिक आदित्य संघाईले पुवुलुको आगमनले उत्सहित भएको बताए । ‘हामी पुवुदुको आगामनले उत्सहित छौं । हाम्रो टिम ईपीएलको लागि तयार छ’ संघाइले भने । ‘टिममा विश्वकै उत्कृष्ट खेलाडीहरु समेत छन् । टिम सन्तुलित बनेको छ ।’

    भैरहवाले आइतबार श्रीलंकाली दुई खेलाडी र ओमानका एक खेलाडीलाई अनुबन्ध गरेको जानकारी गराएको हो ।

    जसमा श्रीलंकाका अलराउन्डर जीवन मेन्डिस र ब्याट्सम्यान मिलिन्डा श्रीवार्दाना र ओमानका बलर बिलाल खान छन् । अलराउन्डर जीवनलले श्रीलंकाको लागि ५८ एकदिवसीय खेलमा ६ सय ६३ रन बनाएका छन् ।

    यस्तै देब्रे हाते ब्याट्सम्यान मिलिन्डा श्रीवार्दानाले २७ एकदिवसीय अन्तर्राष्ट्रिय खेलमा ५ सय १६ रन जोडेका छन् । लेफ्ट आर्म फास्ट मिडियम बलर बिलाल खानले हालै काठमाडौंमा सम्पन्न क्रिकेट विश्वकप लिग टु ट्राई सिरिजमा उत्कृष्ट प्रदर्शन गरेका थिए । उनले सन् २०१९ को टी ट्वान्टी विश्वकप छनोट प्रतियोगितामा १८ विकेट लिएका छन् । भैरहवाले यसअघि नै ड्वाने स्मिथलाई अनुबन्ध गरिसकेको छ ।

    नेपाली राष्ट्रिय टिमका सदस्य शरद भेषावकरको कप्तानीमा रहेको भैरहवाको टिम खेलाडीको सूचि हेर्दा बलियो देखिएको छ । अझ चार विदेशी खेलाडी आएपछि टिम अझै सन्तुलित बनेको प्रशिक्षक दासानायके र टिम मालिक आदित्य संघाईले बताए ।

    ‘हामीसंग राष्ट्रिय टिमकै ५ जना खेलाडी छन् । विदेशका ४ जना स्टार खेलाडी छन् । अन्य यू१९ का खेलाडीहरु छन् । टिम सन्तुलित बनेको छ’ संघाईले भने ।

    यस्तै पुवुदुले पनि दुई श्रीलंकन खेलाडीसंग आफू यसअघि परिचित रहेको र नेपालको खेलाडीहरुसंग पनि राम्रो सम्बन्ध रहेको बताए । ‘पाँच राष्ट्रिय टिमका खेलाडी अनि युवा प्रतिभाहरु टिममा छन् । शरद अनुभवी खेलाडी छ । टिम सन्तुलित बनेको छ’ पुवुदुले भने ।

    उनले ट्यालेन्ट हन्टका लागि आफू भैरहवा जाने र शरद भेषावकरसंग भेटेर ट्यालेन्ट हन्ट गर्ने बताए ।

    भैरहवाले गत संस्करणमा ट्यालेन्ट हन्टबाट ल्याएका युवा स्टार कुशल मल्ल अहिले राष्ट्रिय टिमको स्टारको रुपमा छन् । केही समयअघि ओडीआईमा अर्धशतक प्रहार गर्ने विश्वकै कान्छो खेलाडी बनेका कुशल अहिले राष्ट्रिय टिमसंग इस्टर्न रिजन खेल्न थाइल्याण्डमा छन् । भैरहवाका मालिक आदित्य संघाईले कुशल अहिले सबैमाझ चर्चित रहेको बताए ।

    राष्ट्रिय टिमको प्रशिक्षकबारे सोचेको छैन : पुवुदु

    पुवुदुलाई फरक प्रसंगमा नेपालको राष्ट्रिय टिमको प्रशिक्षक बन्न अनुरोध गरे के गर्नुहुन्छ भन्ने प्रश्नमा उनले अहिले आफ्नो ध्यान ईपीएलमा मात्र रहेको र त्यतातिर नसोचेको बताए ।

    ईपीएलको यस सिजन आगामी चैत्र १ देखी १५ गते सम्म कीर्तिपुरस्थित टीयू अन्तर्राष्ट्रिय क्रिकेट मैदानमा हुँदैछ । भैरहवा ग्लाडिएटर्सले आफ्नो पहिलो खेल चैत २ गते काठमाडौं किंग्स ११ सँग खेल्नेछ ।

    भैरहवाको टोली: शरद भेषावकर, प्रदीप ऐरी, मोहम्मद आरिफ शेख, कृष्ण कार्की, भुवन कार्की, दिपेश श्रेष्ठ, रोहित कुमार पौडेल, हरि शंकर झा, अभिनाश बोहरा, कुशल मल्ल, विकास आग्री र हिमान्शु दत्त

    विदेशी खेलाडी: ड्वाने स्मिथ, जीवन मेन्डिस र मिलिन्डा श्रीवार्दाना बिलाल खान,

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast