आईतवार, चैत्र १६, २०७६
    बिदेश

    कन्हैया कुमारविरुद्ध देशद्रोह मुद्दा चलाउन दिल्ली सरकारकाे अनुमति

    शनिबार, १७ फागुन २०७६, आहाखबर

    नयाँ दिल्ली, १७ फागुन । दिल्ली सरकारले जवाहरलाल नेहरू विश्वविद्यालय (जेएनयू) छात्र संघका पूर्वअध्यक्ष कन्हैया कुमारविरुद्ध मुद्दा चलाउन अनुमति दिएको छ । समाचार एजेन्सी पीटीआईका अनुसार शुक्रबार अरबिन्द केजरीवाल नेतृत्वको दिल्ली सरकारले कन्हैया कुमारविरुद्ध मुद्दा चलाउन प्रहरीलाई अनुमति दिएको हो ।

    ‘राष्ट्रविरोधी नारा’लगाएको आरोपमा दिल्ली प्रहरीले कन्हैयासहित उमर खालिद, अनिर्बानका अलावा सात जनालाई अभियुक्त बनाउँदै देशद्रोहको आरोपमा अदालतमा मुद्दा दायर गरेको थियो। 

    एक वर्षअघि दिल्ली प्रहरीले देशद्रोहको आरोपमा कन्हैया, उमर, आनिर्बानसहित विद्यार्थीविरुद्ध एक हजार २ सय पृष्ठको आरोपपत्र तयार गरेको थियो। तर, अदालतले देशद्रोहको मुद्दा चलाउन राज्य सरकारको अनुमतिबिना सम्भव नभएको भन्दै रोकेको थियो। दिल्ली प्रहरीले भारतीय संसद् भवन आक्रमणका मास्टरमाइन्ड अफजल गुरुको समर्थन कन्हैयासहितका विद्यार्थीले नारा लगाएको पनि आरोप लगाएको छ।

    गत हप्ता मात्रै दिल्ली प्रहरीले मुख्यमन्त्री केजरीवाललाई पत्र लेखेर कन्हैयासहितका विद्यार्थी नेतालाई मुद्दा चलाउने अनुमति दिन आग्रह गरेको थियो। यद्यपि, यस्ताे मुद्दा अघि बढाउन दिल्ली सरकारले अनुमति दिएकाे थिएन ।

    भारतीय सञ्चारमाध्यमका अनुसार देशद्रोहको मुद्दा चलाउनका लागि सम्बन्धित राज्य सरकारको अनुमति चाहिने संवैधानिक प्रावधान छ। केन्द्रीय गृहमन्त्री अमित शाह र दिल्लीका मुख्यमन्त्री अरविन्द केजरीवालबीच भेट भएको केही दिनपछि नै सात विद्यार्थी नेताविरुद्ध देशद्रोहको आरोपमा मुद्दा चलाउन प्रहरीले अनुमति पाएकाे हाे । 

    केन्द्रको नेतृत्वमा रहेको भारतीय जनता पार्टी नेतृत्वकाे सरकारले कन्हैया कुमारसहितका विद्यार्थी नेतालाई देशद्रोहको मुद्दा नचलाएको भन्दै आलोचना गर्दै आएको थियो।

    सन् २०१६ को फेब्रुअरी ९ मा जेएनयूमा उनीहरूले भारतविरोधी नारा लगाएको आरोप लागेको थियो। घटना भएको चार वर्षपछि कन्हैयासहित अन्य विद्यार्थीविरुद्ध अदालतमा देशद्रोहको मुद्दा चल्न लागेकाे हाे । 

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast