बिहिवार, जेष्ठ १५, २०७७
    खेल संसार

    शनिबार नेपाल मलेसियासँग भिड्दै, यस्तो छ हेड टु हेड अवस्था

    शुक्रबार, १६ फागुन २०७६, आहाखबर

    काठमाडौं, १६ फागुन

    नेपालले शनिबार एसीसी इस्टर्न रिजन टी–२० अन्तर्राष्ट्रिय क्रिकेटमा मलेसियासँग भिड्दैछ। थाइल्यान्डको ब्याङककमा हुने खेल नेपाली समयअनुसार अपराह्न सवा १२ बजे सुरु हुनेछ। फेब्रुअरी २९ देखि मार्च ६ सम्म हुने खेलका लागि नेपाली टोली बिहीबार त्यसतर्फ गइसकेको छ।

    एसिया कप छनोटको पहिलो खुड्किलोको रूपमा रहेको इस्टर्न रिजन खेल जित्दै नेपाल एसिया कपको छनोट चरणमा प्रवेश गर्ने लक्ष्यमा रहेको छ। उक्त चरणमा पुग्न कम्तिमा शीर्ष दुईमा नेपालले स्थान बनाउनु पर्नेछ। प्रतियोगितामा नेपालसहित पाँच टीमले सहभागिता जनाएका छन्। तीन टीमले कोरोना भाइरसका कारण नाम फिर्ता लिएपछि पाँच टीमले मात्र खेल्ने भएका हुन्। भुटान, चीन र म्यान्मारले अन्तिम समयमा कोरोना भाइरसको प्रकोप कारण देखाउँदै टीमको नाम फिर्ता लिएका हुन्।

    नेपाल र मलेसिया हेड टु हेड
    नेपालले पछिल्ला खेलहरूमा मलेसियालाई पराजित गर्दै आइरहेको छ। पछिल्लो पटक सिङगापुरमा गत जुलाईमा भएको खेलमा नेपालले मलेसियालाई ७ विकेटले पराजित गरेको थियो। पछिल्ला चार टी–२० क्रिकेटमा मलेसियासँगको नेपालको नतिजा यस्तो छ :

    नेपाल     मलेसिया    मिति
    ८६/३ (८)    ८३/७ (९)     जुलाई २४, २०१९
    १७३/६ (२०)  १६७/७ (२०)   जुलाई १४, २०१९
    १२९/३ (१८.३)  १२८/९ (२०)   जुलाई १३, २०१९
    १०१/२ (१२.४)  १०० (१९.३)  अक्टोबर ६, २०१८

    यसैगरी एसीसी टी–२० क्रिकेटमा भने नेपालले मिश्रित नतिजा निकालेको छ। नेपालले मलेसियासँग खेलेको तीन खेलमध्ये दुई खेलमा जित र एकमा हार व्यहोरेको छ। सन् २००७ मा भएको खेलमा नेपालले मलेसियालाई २१ रनले पराजित गरेको थियो भने २००९ मा नेपाल ६ विकेटले पराजित भएको थियो। त्यस्तै सन् २०१३ मा मलेसियामाथि नेपालले १९ रनको जित निकालेको थियो।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast