सोमबार, चैत्र २४, २०७६
    राज्य-समाज

    चीनद्वारा ‘वालस्ट्रिट जर्नल’का तीन पत्रकारलाई देश निकाला

    बुधबार, ७ फागुन २०७६, आहाखबर

    बेइजिङ, ७ फागुन

    चीनमा रहेर अमेरिकी पत्रिका वाल स्ट्रिट जर्नलका लागि काम गर्दै आएका तीन पत्रकारलाई देश निकाला गरिएको छ ।

    चीनले उनीहरुले पत्रिकामा लेखेको स्तम्भ ‘रंगभेदी’ भएको आरोप लगाउँदै देश निकाला गरेको हो । देश निकाला गरिएका तीनै जनालाई पाँच दिनभित्र चीन छाड्न उर्दी समेत जारी गरिएको छ ।

    दुई अमेरिकी नागरिकहरु व्यूरो उपप्रमुख जोन चिन र चाओ देङ तथा अष्ट्रेलियन नागरिक फिलिप वेनलाई देश निकाला गरिएको हो ।  यसबारे पत्रिकाले कुनै टिप्पणी गरिसकेको छैन ।

    पत्रिकामा गत ३ फेब्रुअरी महिनामा प्रकाशित एक लेखमा चीनले कोरोनाभाइरस महामारी नियन्त्रणका लागि चालेका कदमको आलोचना गर्दै लेख स्तम्भ प्रकाशित गरिएको थियो ।

    चिनियाँ विदेशमन्त्रालयले पत्रिकालाई माफी माग्न पटक पटक आग्रह गर्दा पनि नटेरेका कारण पत्रकारलाई देश निकाला गर्नुपरेको दलिल दिएको छ ।

    पत्रिकाले आफ्ना पत्रकारलाई देश छाड्नका लागि चीनले ५ दिनको समयसीमा दिएको जनाएको छ । यद्यपि उक्त स्तम्भ ती पत्रकारले नलेखेको पत्रिकाले स्पष्ट पारेको छ ।

    उक्त स्तम्भमा महामारीविरुद्ध चिनियाँ प्रशासनको कदम गोप्य र ‘आत्म केन्द्रित रहेको भन्दै चीनप्रति विश्वको भरोसा ‘डगमगाएको’ लेखिएको थियो ।

    चिनियाँ विदेशमन्त्रालयका प्रवक्ता गेङ शुआङले उक्त स्तम्भ ‘रंगभेदी’ रहेको तथा यसले महामारीविरुद्ध चीनको कदमको निन्दा गरेका कारण उनीहरुलाई देश निकाला गरिएको जनाएका छन् ।

    ‘चीनविरुद्ध आक्रमक एवं रंगभेदी भएको र चिनियाँ जनताले यस्तो सामग्री प्रकाशन गर्ने मिडियालाई स्वागत गर्दैनन् ।’ गेङले भने ।

    दुई दशकमा वैधानिक रुपमा चीनमा पत्रकारिता गरिरहेका पत्रकारलाई देशनिकाला गरिएको यो पहिलो घटना रहेको बीबीसीले जनाएको छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast