शुक्रबार, आषाढ २६, २०७७
    राज्य-समाज

    माधव नेपाल र बाबुराम भट्टराई मुद्दा नचलाइनुको रहस्य

    आईतवार, ४ फागुन २०७६, आहाखबर

    काठमाडौं, ४ फागुन

    सर्वोच्च अदालतले पूर्व प्रधानमन्त्रीद्वय माधवकुमार नेपाल र बाबुराम भट्टराईलाई ललिता निवास जग्गा प्रकरणमा मुद्दा नचालाउनुको कारण माग गरेपछि नीतिगत निर्णयको व्याख्या गर्ने जिम्मेवारी अख्तियार दुरुपयोग अनुसन्धान आयोगमाथि आईपरेको छ  ।

    अख्तियार, प्रधानमन्त्रीद्वय नेपाल र भट्टराई र महान्यायाधिवक्ता कार्यालयलाई विपक्षी बनाएर वरिष्ठ अधिवक्ता बालकृष्ण न्यौपानेले सर्वोच्चमा दर्ता गरेको रिटमा गत शुक्रबार सर्वोच्चले १५ दिनभित्र कारणसहित जवाफ दिन भनेको छ ।

    अब अख्तियारले सरकारी जग्गा ब्यक्तिको नाममा लैजाने निर्णय गर्ने मन्त्रीपरिषद् र त्यसको नेतृत्व गर्ने प्रधानमन्त्रीहरुले कसरी उन्मुक्ति पाउँछन् भन्ने स्पष्ट पार्नुपर्ने छ । नीतिगत निर्णयमा अख्तियार प्रवेश गर्न नमिल्ने बताएको अख्तियारले कस्ता कस्ता निर्णय नीतिगत हुन भनेर पनि स्पष्ट पार्नुपर्ने छ ।

    यस्तै मुद्दामा वि.सं. २०५३ असोज ८ गते बालकृष्ण न्यौपानेले नै तत्कालिन श्री ५ को सरकार विरुद्ध हालेको मुद्दाको फैसलामा तत्कालिन न्यायाधीश केदारनाथ उपाध्याय लगायतको विशेष इजलाशबाट नीतिगत निर्णयको सन्दर्भमा ब्याख्या भईसकेको छ ।

    अख्तियारको निर्णय विरुद्ध रीट दायर गरेका वरिष्ठ न्यौपानेले सरकारी जग्गा व्यक्तिका नाममा गर्नु नीतिगत निर्णय नभएर व्यक्तिगत स्वार्थ भएकाले त्यस्ता निर्णयमा मन्त्री मात्र नभइ प्रधानमन्त्री समेत दोषी हुने दाबी गर्छन ।

    अहिलेको मुद्दाको पक्षबाट बहस गरेका वरिष्ठ अधिवक्ता डा. नृसिंह कुमार खत्रीले भने सम्पत्ति फिर्ता दिएकै कारणबाट सर्वोच्चका न्यायाधीश कुमार रेग्मी र विष्णु पौडेका छोरा नबिन पौडेललाई उन्मुक्ति दिन नमिल्ने बताउँछन् ।

    न्यायाधीश रेग्मी र नबिन पौडेलको नाममा ललिता निवासको जग्गा आउँदा त्यो प्राप्त गर्ने प्रक्रिया सही वा गलत के हो भनेर हेर्ने र सो अनुसार कारबाही अगाडि बढाउने जिम्मेवारी सर्वोच्चकै भएको पूर्व प्रधानन्यायाधीश उपाध्याय बताउँछन् ।

    ललिता निवासको जग्गा प्रकरण नीतिगत निर्णय नभएर भ्रष्टाचार भएको ठहरिए अख्तियारले पूर्व प्रधानमन्त्रीद्वयलाई संविधानको धारा २३९ बमोजिम भ्रष्टाचार मुद्दा चलाउन सक्ने देखिन्छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast