आईतवार, चैत्र १६, २०७६
    आर्थिक खबर

    आकासियो कुखुराको मासुको मूल्य, राज्य र व्यापारीकै मिलोमतोमा लुट्ने काम भएको उपभोक्ता मञ्चको आरोप

    मंगलवार, २१ माघ २०७६, मधुरिमा पाण्डेय.

    काठमाडौं, २१ माघ । केहि समययतादेखि कुखुराको मासुको मूल्य निरन्तर बढेको छ । डेढ महिनामै कुखुराको मासुको मूल्य प्रतिोजी १ सय ६५ रुपैयाँले बढेको हो ।

    डेढ महिना अघि कुखुराको मासुको खुद्रा मूल्य २ सय ४० रुपैयाँ थियो भने त्यहि मासु मंगलबारसम्म ४ सय ५० रुपैयाँमा किनबेच भइरहेको छ । 

    डेढ महिना अघि व्यापारीले लागत मूल्य नपाएको भन्दै १० दिनसम्म चल्ला उत्पादन बन्द गरेका थिए । त्यति मात्र नभएर उनीहरुले ३० लाख चल्ला जिउँदै खाल्डोमा पुरेका थिए भने ५० करोड बराबरको चल्ला उत्पादन गर्ने अण्डा नै नष्ट गरेका थिए । बजारमा अहिले त्यसैको प्रभाव देखिएको छ । 

    लामो समयदेखि ललितपुरको ग्वार्कोमा कुखुराको मासु र अण्डाको व्यवसाय सञ्चालन गरेर बसेका एकव्यवसायीले कुखुराको दानाको भाउ र चल्लाको मूल्य बढेकोले पनि मासु र अण्डाको मुल्य बढेको बताएका छन् । 

    मकैको भाउ बढेसँगै दाना उद्योगीले कुखुराको सबै खाले दानाको भाउ बढाएका थिए । जसको असर कुखुराको मासु र अण्डाको मूल्यमा परेको छ । विशेष गरी विचौलियाका कारण बजारमा अनियमितता बढेको उनको बुझाइ छ ।

    ‘विगत ३ हप्तादेखि कुखुराको मासु र अण्डामा कुनै सन्तुलन छैन । खुखुराको मासु खुद्रामा चार सय ५० सम्म किन बेच भएको छ । तर, पसलै पिच्चे १०–२० को फरक पाइन्छ । किसानले आफ्नो मिहिनेतको उचित मूल्य नपाएको कारण यस्तो भएको हो ।’ उनले भने, मिहिनेत किसानले गर्छ, मूल्य निर्धारण बिचौलियाले गर्छ । जसले गर्दा किसानले पनि आफ्नो मूल्य पाउँदैन भने बजारमा पनि अनियमितता हुन्छ ।’

    पछिल्लो पटक बजारमा कुखुराको मासु र अण्डाको मुल्य अस्वभाविक रुपमा बढेकोले मासु किन्ने उपभोक्ता मारमा परेका छन् । छोटा अवधिमै यि विविध कारणले मूल्य अस्वभाविक बढेको उपभोक्ता बताउँछन् । यस विषयमा सरकारले चासो नदिएर मौन बसेको उनीहरुको गुनासो छ । बजारमा यसरी ऐन विपरीत मनपरी मूल्य वृद्धि हुँदा पनि सरकारको उपस्थिति नदखिएको उपभोक्ताहरु बताउँछन् । 

    ऐन विपरीत व्यापारीहरुले उत्पादन रोकेकाले कारबाही गर्नुपर्ने भन्दै उपभोक्ताकर्मीहरुले विभागमा उजूरीसमेत दिए तर, सामान्य सोधपुछ बाहेक ‘एक्सन’ अघि बढेन । व्यापारीले उत्पादन बन्द गरेर मनपरी मूल्य बढाएर बजार आफ्नो हातमा लिँदा पनि सरकारी निकायले हस्तक्षेप गर्न आवश्यक नै ठानेको देखिदैन । मूल्य बढाउने व्यापारी कसैलाई पनि सरकारले कारवाहीको दायरामा ल्याएको छैन । प्रत्येक पसलमा मनपरी किसिमले उपभोक्ता ठगिएका छन् यसमा सरकार मौन बसेको देख्दा यो राज्य र व्यापारीकै मिलोमतोमा लुट्ने काम भइरहेको उपभोक्ता मञ्च नेपालका केन्द्रिय सदस्य रोशन पोखरेलको भनाइ छ । 

    उनले भने, ‘यसरी लगातार मूल्य बढ्दा रान्ज्यको उपस्थिती देदिएन, राज्य मौन बस्यो । उपभोक्तालार्य सुचनाको अधिकार छ । उपभोक्ताले पहिल्यै जानकारी पाउनु पर्ने हो जानकारी नदिएर नै जुन लगातार मूल्य वृद्धि भइरहेको छ सरकारले यसको स्पष्टिकरण दिनुपर्छ ।’ 

    राष्ट्रिय कुखुरा व्यवसायी सङ्घले गत हप्ता तोकेको नयाँ मूल्यअनुसार काठमाडौँ उपत्यकामा तयारी मासुको मूल्य प्रतिकेजी ३ सय ५० रुपैयाँ छ । तर, अहिले बजारमा प्रतिकेजी मासु ४ सय ५० रुपैयाँ भन्दा बढीमा कारोबार भइरहेको छ ।

    गत मङ्सिर २९ देखि पुस ६ गतेसम्म चलाइएको ‘चिकेन होलिडे’ को प्रभाव अहिले मासुमा देखिएको छ । कुखुराको दाना लगायतको उत्पादन लागत बढेको भन्दै किसानले चल्ला नै नराखेका कारण पनि अहिले बजारमा माउ कुखुरा सप्लाइ कम हुँदा मुल्य बढेको देखिन्छ । यसरी बजारमा मनपरी किसिमबाट मूल्य वृद्धि हुँदा अनुगमन र नियन्त्रण गर्ने निकाय मौन बस्नुचाहिँ रहस्यमय देखिएको छ ।

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast