बिहिवार, जेष्ठ २२, २०७७
    राज्य-समाज

    ‘एमसीसी’बारे अध्ययन गर्न नेकपाद्वारा गठित कार्यदलले सुरु गर्‍यो काम

    सोमबार, २० माघ २०७६, आहाखबर

    काठमाडौं, माघ २०

    सत्तारुढ नेकपाले अमेरिकी सहयोग मिलेनियम च्यालेन्ज कर्पोरेसन (एमसीसी)बारे अध्ययन गर्न बनाएको कार्यदलले काम सुरु गरेको छ ।

    कार्यदलको पहिलो बैठक सोमबार सिंहदरबारस्थित नेकपा संसदीय दलको कार्यालयमा बस्यो ।

    एमसीसीबारे नेकपाभित्र शीर्ष नेताहरुबीचमै दन्तबझान हुँदै आएको छ । उनीहरुबीचको मतभिन्नताको असर पार्टी केन्द्रीय समिति बैठकमा परेपछि एमसीसीबारे अन्योलता बढाउने गरी निर्णय भयो ।

    नेपाल कम्युनिस्ट पार्टी नेकपाका अध्यक्ष तथा प्रधानमन्त्री केपी शर्मा ओली अमेरिकी सहयोग मिलेनियम च्यालेन्ज कर्पोरेसन (एमसीसी) पारित गर्ने पक्षमा देखिँदै आएका छन् ।

    तर, अर्का अध्यक्ष पुष्पकमल दाहाल र वरिष्ठ नेता माधव नेपाल ओलीकै गतिमा देखिएका छैनन् ।

    तीन गुटका मूल नेताहरुबीच मतभिन्नताको असर नेकपा केन्द्रीय समिति बैठकमा देखियो ।

    यही माघ १४ गते बसेको प्रतिनिधिसभाको बैठकमा प्रधानमन्त्री केपी शर्मा ओलीले संसदमा अनुमोदनका लागि प्रतिक्षारत् एमसीसी छिटोभन्दा छिटो पारित गर्नेमा प्रतिबद्ध देखिए ।

    नेकपा बैठकमा ओली समर्थक केन्द्रीय सदस्यहरुले एमसीसीकै पक्षमा आवाज उठाए ।

    तर, ओलीसँग अर्का अध्यक्ष दाहालको लय मिलिरहेको थिएन ।

    हो, दाहाल समूहका केन्द्रीय सदस्यहरुले एमसीसी हतारमा पारित गर्न नहुने आवाज बुलन्द गरे ।

    नेकपाभित्र एउटा गुट सन्चालन गरिरहेका वरिष्ठ नेता माधवकुमार नेपाल एमसीसीबारे आशंकाहरु पालिरहेका छन् ।

    नेपाल समर्थक केन्द्रीय सदस्यहरुले एमसीसीबारे आशंकायुक्त भनाइहरु बैठकमा राखेका थिए ।

    उसो त पूर्वप्रधानमन्त्री झलनाथ खनाल पनि एमसीसीको समर्थक होइनन् । नेता भीम रावल त एमसीसीको कटु आलोचक बनेर निस्किएका छन् । यसले नेकपाभित्र एमसीसीको विपक्षीहरु बलियो रहेको बुझ्न गाह्रो छैन ।

    नेकपाभित्र शीर्ष नेताबीच एक मत नहुँदा केन्द्रीय समिति बैठकले एमसीसीबारे ठोस निर्णय लिन सकेन । र, तीन सदस्यीय अध्ययन कार्यदल गठनको औपचारिकता पूरा गरेर झनै अन्योलता बढाइयो ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast