सोमबार, चैत्र २४, २०७६
    स्कुल-कलेज

    श्रम र रोजगारीलाई शिक्षासंग जोड्नुपर्छ : मन्त्री पोखरेल

    शनिबार, ११ माघ २०७६, आहाखबर

    लम्की, ११ माघ

    शिक्षा विज्ञान तथा प्रविधिमन्त्री गिरिराजमणि पोखरेलले शिक्षालाई श्रम र रोजगारीसँग जोडेर लगानी गर्नुपर्ने बताउनुभएको छ ।

    कैलालीको टीकापुरमा प्राविधिक शिक्षा तथा व्यवस्थापन तालिम परिषद्को ३७औँ व्यवस्थापन समीक्षा गोष्ठीलाई आज सम्बोधन गर्दै उहाँले सीपयुक्त जनशक्ति उत्पादनको परिकल्पनासहित सरकारले प्राविधिक शिक्षा ऐन ल्याउने जानकारी दिनुभयो ।

    “सबैको लागि सीप भन्ने शिक्षाको अवधारणा रहेको छ । त्यस कारण प्राविधिक शिक्षाबाट प्राप्त ज्ञान र सीप व्यवहारमा लागू भएमा समृद्धि हुन्छ”, मन्त्री पोखरेलले भन्नुभयो, “प्राविधिक धारको शिक्षाको योग्यता निर्धारणका लागि सरकारले राष्ट्रिय शिक्षा पेशागत अभियान चलाउने योजनामा रहेको छ । यसको खाका बनाई कार्य अगाडि बढाइसकेको छ ।”

    सरकारले ‘एक तह एक’ नमूना प्राविधिक शिक्षालयको अवधारणा राख्दै अहिले ६०४ वटा तहमा प्राविधिक शिक्षालय विस्तार गरिसकेको कार्यक्रममा जानकारी दिइएको थियो ।  कार्यक्रममा सुदूरपश्चिम प्रदेश सांसद डा रणबहादुर रावलले टीकापुरलाई शैक्षिक नगरीका रुपमा विकास गर्न जोड दिनुभयो ।

    प्रदेश सांसद रतन थापाले सीप र ज्ञानलाई व्यवहारमा लागू गर्ने खालको शिक्षाको आवश्यकता बढ्दै गएकाले यसले सफलता र समृद्ध हुन सघाउने बताउनुभयो ।

    शिक्षा विज्ञान तथा प्रविधि मन्त्रालयका सचिव महेशप्रसाद दाहालले प्राविधिक शिक्षाको हेर्ने काम स्थानीय र प्रदेश सरकारको रहेकाले प्राविधिक शिक्षालय गाभिन धेरै विधाको शिक्षामा जोड  दिन आग्रह गर्नुभयो ।

    प्राविधिक शिक्षा तथा व्यवस्थापन तालिम परिषद्का सदस्य सचिव पुष्परमण वाग्ले परिषद्का गतिविधि जानकारी दिनुभएको थियो । समीक्षामा ५९ प्राविधिक शिक्षालयका प्रमुखको सहभागिता छ । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast