शनिबार, फागुन १०, २०७६
    बिदेश

    भुलवश युक्रेनी विमान खसालेको इरानद्वारा स्विकार

    शनिबार, २६ पौष २०७६, आहाखबर

    एजेन्सी, २६ पुस । इरानी सेनाले भुलवश युक्रेनी विमानलाई खसालिएको स्वीकार गरेको छ । शनिवार प्रकाशित विज्ञप्तिमा इरानको सेनाले “मानवीय त्रुटिका कारण“ विमान खसालिएको बताएको हो ।

    इरानी सरकारी टेलिभिजनबाट सार्वजनिक गरिएको विज्ञप्तिमा उक्त घटनामा संलग्न व्यक्तिहरूलाई कारबाही गरिने उल्लेख छ । यसअघि इरानी क्षेप्यास्त्रका कारण उक्त यात्रुवाहक विमान बुधवार तेहरानमा दुर्घटनाग्रस्त भएको सङ्केत उपलब्ध प्रमाणले गरेको पश्चिमा देशका नेताहरूले बताएका थिए । तर इरानले त्यसको खण्डन गरेको थियो ।

    इरानी अधिकारीहरूले पश्चिमा देशको आरोपलाई ’हास्यास्पद’ भन्दै खण्डन गरेका थिए तथा त्यसलाई अमेरिकाको ’मनोवैज्ञानिक कारबाही’ को अंश बताएका थिए । इरानले इराकस्थित अमेरिकी सैनिकहरू बसेका दुईवटा आधार शिविरमा क्षेप्यास्त्र आक्रमण गरेको केही घण्टापछि नै उक्त विमान दुर्घटना भएको थियो । 

    तेहरानबाट किएभका लागि उडेको युक्रेन इन्टर्न्याश्नल एअरलाइन्सको विमान ७५२ मा अधिकांश यात्रु इरान र क्यानडाका थिए । दुर्घटनामा विमानमा सवार विभिन्न देशका सबै १ सय ७६ नागरिकको मृत्यु भएको थियो । मृतकमध्ये १५ जना बालबालिका थिए । दुर्घटना भएपछि तेहरानस्थित युक्रेनी दूतावासले पहिला विमानको इन्जिनमा समस्या देखिएको बताएको थियो ।

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast