मंगलवार, फागुन ६, २०७६
    सावधान

    मोबाइलमा केटाको फोन आएकाे भन्दै छोरीको हत्या

    बिहिवार, २४ पौष २०७६, आहाखबर

    वीरगञ्ज, २४ पुस । माेबाइलमा केटाकाे फाेन आएकाे भन्दै आक्राेशित बनेकाे परिवारले कुटपिट गर्दा १५ वर्षीया किशोरीकाे मृत्यु भएकाे छ ।

    पर्सा प्रहरीले १५ वर्षीया किशोरी पुनिता कुमारीको हत्या अभियोगमा आमासहित चार जना आफन्तलाई पक्राउ गरेको छ।

    पक्राउ पर्नेहरुमा पोखरीया नगरपालिका वडा नम्बर-९ सेमरबारी बस्ने पुनिताकी आमा शिवकली देवी, काका सन्तोष दास तत्वा, राजेन्द्र दास तत्वा र ट्याक्टर चालक जितेन्द्र यादव रहेको पर्साका प्रहरी उपरीक्षक सामेन्द्रसिंह राठौरले बताए

    करिब एक महिनाअघि पुनिता हराएको सूचना प्रहरीमा पुगेको थियो। प्रहरीले सूचनाकै आधारमा पुनिताको खोजीकार्य जारी राखेको थियो। अन्ततः पुस २१ गते पुनिताको शव फेला पर्‍यो। पुनिताको शव परालमा जलाएर हत्या गरी घर नजिकै खोलामा गाडेको अवस्थामा फेला परेको प्रहरीले बताएको थियो।

    प्रहरी उपरीक्षक राठौरले भने, ‘गोप्य सूचनाका अधारमा हामी अनुसन्धान गर्न शव गाडिएको ठाउँमा पुगेका थियौँ, घटनाको प्रकृति हेर्दा डिजेल हालेर शव जलाएको जस्तो देखिन्थ्यो। बाँकी रहेको शरीरको भाग पर लगेर जमिनमा गाडिएको थियो।’ 

    शवको आधा भाग जल्नु र बुवा फरार रहनुले घटनालाई थप रहस्यमयी बनाएको थियो। प्रहरीको अनुसन्धानमा पुनिताको मोबाइलमा कुनै केटाको फोन आउँदा आक्रोशित बनेको परिवारले कुटपिट गर्दा पुनिताको मृत्यु हुन गएको बुझिएको छ। घटनालाई ढाकछोप गर्न मट्टितेल छर्केर जलाएर शव गाडेको अनुसन्धानबाट खुलेको पर्सा प्रहरीको दावी छ।

    सन्तोष दास तत्वा यसअघि पनि पोखरीया आसपासमा हुने विभिन्न आपराधिक घटनाको नाइके भएकोले उनकै उक्साहटमा घटना भएको प्रहरीको भनाइ छ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast