मंगलवार, फागुन ६, २०७६
    पर्यटन समाचार

    भ्रमण वर्ष उद्घाटनको तयारी अन्तिम चरणमा, उद्घाटको दिन दीपावली मनाउन आह्वान

    सोमबार, १४ पौष २०७६, आहाखबर

    काठमाडौँ, १४ पुस

    आज भिजिट नेपाल सचिवालयले पत्रकार सम्मेलन गरी भिजिट नेपाल २०२० (नेपाल भ्रमण वर्ष) उदघाटनको तयारी अन्तिम चरणमा पुगेको जनाएको छ ।  

    उद्घाटन जनवरी १ अर्थात् पुस १६ गते ३ बजेबाट दशरथ रंगशालामा हुने भिजिट नेपाल राष्ट्रिय संयोजक सुरज वैद्यले जानकारी दिएका छन्। उदघाटन राष्ट्रपति विद्यादेवी भन्डारीबाट हुने छ भने विशेष सम्बोधन प्रधानमन्त्री केपी शर्मा ओलीबाट हुने उनले जानकारी गराएका छन्। जनवरी १ मै सातै प्रदेशबाट भिजिट नेपाल २०२० को उदघाटन हुने वैद्यको भनाइ छ। उद्घाटन समारोहमा भारतीय तथा चिनियाँ पर्यटन मन्त्रीसमेत सहभागी हुनेछन्। 

    सरकारले २० लाख पर्यटक भित्र्याउने लक्ष्यसहित भिजिट नेपाल २०२० मनाउने तयारी गरेको छ। साथै सरकारले पर्यटकको नेपाल बसाइ र खर्च पनि बढाउँदै लैजाने लक्ष्य लिएको छ। उद्घाटनकै दिने भिजिट नेपाल २०२० को गीत पनि सार्वजनिक हुने भएको छ। संस्कृति, पर्यटन तथा नागरिक उड्डयन मन्त्री योगेश भट्टराईले भ्रमण वर्षका लागि आवश्यक तयारी पूरा गरेको बताए। आफूले मन्त्रालयको जिम्मेवारी लिएसँगै भिजिट नेपाल २०२० सफल पार्न करिब एक सयभन्दा बढी संघसंस्था, सरकारी, निजी क्षेत्र, गैरसरकारी संस्थाहरु, अन्तर्राष्ट्रिय क्षेत्र, नेपालस्थित कूटनीतिक नियोग, सामाजिक क्षेत्र,  स्वयंसेवी समूह–संगठनलगायतका अनेकौं क्षेत्रसँग छलफल गरेकोसमेत उनको भनाइ छ।

    ‘हाम्रो प्रयास र प्रयत्न सिंगो मुलुकलाई उत्सवमय बनाउने हो। हरेक नेपालीलाई यो अभियानमा जागरुक र उद्देलित बनाउने हो। यो अभियानमा मुलुकलाई जुरुक्कै उठाएर विश्व समुदायलाई नेपाल स्थायी शान्ति, स्थिरता, सुशासन र समृद्धिको बाटोमा अघि बढेको सन्देश दिनुछ,’ मन्त्री भट्टराईले भने, ‘नेपाल पर्यटनका लागि संसारकै एक अद्वितीय पर्यटकीय गन्तव्य हो भनेर दुनियाँलाई थाहा दिनु हो।’

    विश्वभरका लगानीकर्तालाई नेपाल लगानीका लागि उपयुक्त मुलुक हो भनेर जानकारी दिनु यस अभियानको उद्देश्य रहेको मन्त्री भट्टराईले बताए। सरकारले ‘नेपाल भ्रमर्ण वर्ष–२०२०’ को शुभारम्भको दिन सबैलाई देशभरि दिपावली गरेर स्वागत गर्न आह्रवान गरेको छ। सबै सरकारी निकाय, निजी क्षेत्र, गैरसरकारी क्षेत्र, विदेशस्थित कूटनीतिक नियोगका कार्यालयमा सबैले दिपावली गर्नेमा  आफू विश्वस्त रहेको उनको भनाइ छ। ‘त्यो दिपावली, त्यो उज्यालोले हाम्रो नयाँ यात्राको संकेत गर्नेछ,’  मन्त्री भट्टराईले भने, ‘अबको हाम्रो यात्रा उज्यालै उज्यालोतिर उन्मुख छ भन्ने सन्देश दिनेछ। म तपाईंहरुमार्फत् आम जनसमुदायलाई अपिल गर्न चाहन्छु, त्यो दिन सबैले दिपावली गरौं।’ 

    २०२० देखि २०३० लाई पर्यटन दशकको रुपमा सञ्चालन गर्नुपर्छ भन्ने योजनामा सरकार रहेको उनले बताए। ‘सरकारको त्यो दशक अभियानमा यहाँहरुको उस्तै सक्रियता, सहभागिता र सहयोग हुनेमा आशावादी छु,’ उनले भने, ‘अब मु्लुक स्थायी शान्ति, स्थिरता र समृद्धिको बाटोमा अघि बढेको छ।’  

    पर्यटनलाई नेपालको अर्थतन्त्रमा प्रमुख आधार मध्येका एक बनाउने सरकारको योजना रहेको उनले बताए। पर्यटनबाट नेपालको कुल गार्हस्थ उत्पादनमा करिब ३ प्रतिशत योगदान छ। १५ औं पञ्चवर्षीय योजना सम्पन्न हुदाँसम्म १० प्रतिशत योगदान गर्ने लक्ष्य राखिएको छ । यसका लागि सरकारले पर्यटन पूर्वाधार निर्माण र सेवामा विस्तारमा जोड दिएको मन्त्री भट्टराईको भनाइ छ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast