बुधबार, फागुन ७, २०७६
    यातायात

    अब सवारी लाइसेन्सको लिखित परीक्षा दिन ३ महीने कोर्ष लिनुपर्ने

    आईतवार, १३ पौष २०७६, आहाखबर

    काठमाडौं, १३ पुस । सवारी चालक अनुमतिपत्र (लाइसेन्स)को परीक्षाको स्वरूप परिवर्तन हुने भएकाे छ । सरकारले ठूला सवारीसाधनको लाइसेन्स परिक्षाकाे स्वरूप परिवर्तन गर्न लागेके हाे ।

    यातायात व्यवस्था विभागले सार्वजनिक सवारीसाधनलाई लक्षित गर्दै लाइसेन्स लिनका लागि तीनमहीने कोर्ष नै लिनुपर्ने गरी संघीय सवारी तथा यातायात ऐनको मस्यौदा तयार पारेको छ ।

    हाल सामान्य लिखित परीक्षापछि ट्रायल दिएर ट्रायलमा पास भएपछि विभागले लाइसेन्स दिइरहेकोमा ठूला सवारीसाधनका लागि लाइसेन्समा कडाइ गर्दै विभागले परीक्षाको स्वरूप परिवर्तन गर्न लागेको हो । विभागका अनुसार उक्त मस्यौदा पास भएर ऐन बनेपछि सवारी चालकले तीनमहीने कोर्ष लिएर मात्रै लिखित परीक्षा दिन पाउनेछन् । 

    उक्त परीक्षामा पास भएपछि चालकले ट्रायल दिनुपर्नेछ । तर, उक्त ट्रायलमा पास हुँदैमा चालकले लाइसेन्स पाउने छैनन् । विभागका महानिर्देशक गोगनबहादुर हमालले भने, ‘ट्रायलपछि चालकले सडकमा ६ महीनासम्म सवारी चलाउनुपर्नेछ र सडकको रिपोर्ट राम्रो आएपछि मात्र चालकले लाइसेन्स पाउनेछन् ।’ उक्त रिपोर्ट कार्ड राम्रो नभए क्रमशः ३र३ महीना म्याद थपिने उनले बताए ।

    विभागले सबैभन्दा बढी सवारी दुर्घटना चालकको लापरबाहीका कारण हुने गरेकाले लाइसेन्स वितरणमा कडाइ गर्न लागेको हो । यसले बढ्दो सवारी दुर्घटनालाई घटाउने विश्वास विभागको छ । ‘सवारी सुरक्षालाई ध्यानमा राखी ठूला सवारीसाधनको लाइसेन्समा कडाइ गर्न लागिएको हो,’ हमालले भने । 

    ऐनको मस्यौदामाथि विभागले पुस १३ र १४ गते सातै प्रदेशका मन्त्रालयका सचिव र विभागीय मन्त्रीसँग छलफल गर्दै छ । प्रदेश सरकारसँगको छलफलपछि मस्यौदा भौतिक पूर्वाधार तथा यातायात मन्त्रालयमा पठाइने महानिर्देशक हमालले बताए । मन्त्रालयले उक्त ऐनमाथि विज्ञको सुझाव लिनेछ र संसद्मा पठाउनेछ । 

    यद्यपि, विभागले प्रदेश सरकारसँग छलफल गरी ऐन संशोधन गर्न पनि सक्नेछ । विभागबाट उक्त मस्यौदा मन्त्रालयमा गयो भने पनि विज्ञको सुझाव लिएर यसलाई संशोधन गर्न सक्ने अधिकार मन्त्रालयसँग छ । याे समाचार आजकाे आर्थिक अभियान दैनिकमा प्रकाशित छ ।

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast