सोमबार, चैत्र २४, २०७६
    अावास-निर्माण

    मेलम्चीको पानी असारभित्र सुन्दरीजलमा, ९५ प्रतिशत काम सकियो

    आईतवार, ६ पौष २०७६, आहाखबर

     हेलम्बु, ६ पुस

    आफ्नै तालमा छङछङ् बगिरहेको मेलम्ची खोलाको समीपमा केही मजदुर रड बुुन्दै छन् । कोही ड्रिल गरेर पहरा फोर्दैछन् । स्काभेटर खोला खोलेर ढुंगा निकाल्न प्रयोग भइरहेको छ । टिप्परहरु बालुवा–गिट्टी बोकिरहेका छन् । अन्य मजदुरहरु फलाम काट्ने रड मिलाउँदै छन् । गत शुक्रबार अपराह्न बहुचर्चित र बहुप्रतिक्षित मेलम्ची खानेपानी आयोजनाको मुहान क्षेत्र सिन्धुपाल्चोकको हेलम्बु गाउँपालिकास्थित आम्बाथानमा यस्तैयस्तै दृश्य देखिन्थ्यो । 
     
    यहाँ इन्जिनियरहरु पहेंलो ज्याकेट र प्लाष्टिक ह्याट लगाएर मजदुरलाई निर्देशन दिइरहेका थिए । चाइनिज कामदार पनि आ–आफ्नै जिम्मेवारीमा व्यस्त थिए । कामको तीव्रता देख्दा सम्झौताको समयअघि नै काठमाडौंमा पानी झर्ने आश गर्न सकिन्थ्यो । चालु आर्थिक वर्षको असार मसान्तभित्रैमा सुन्दरीजलमा पानी झार्ने योजनाका साथ अहिले यहाँ कामलाई तीव्रता दिइएको छ ।

    आयोजनाका कार्यकारी निर्देशक तिरेशप्रसाद खत्री भन्छन्, “आगामी असारभित्रैमा अस्थायी बाँध बाँधेरै भए पनि सुन्दरीजलमा पानी झार्ने तयारी भइरहेको छ ।” तेस्रो पटक नियुक्त भएको चिनियाँ ठेकेदार कम्पनी सिनो हाइड्रोले पूर्ण क्षमतामा कामदार र मेशिनरी औजार परिचालन गरेकाले असारमा पानी पु¥याउने लक्ष्य पूरा हुने विश्वास व्यक्त गर्दै आएको छ । 
     
    यसका लागि कार्यकारी निर्देशक खत्री पनि निरन्तर फिल्डमा आफैं खटिदै आएका छन् । यहाँ अहिले हेडवक्र्स (इन्टेक) को काम तीब्ररुपमा भइरहेको छ । त्यही हेडवक्र्समार्फत पानी टनेलमा पठाइन्छ । टनेलको गेट बनाउने कामसमेत जारी छ । उक्त कम्पनीसँग भएको सम्झौतामा ३२ वटा गेट बनाइने उल्लेख छ । 

    १० प्रतिशत बोनसको व्यवस्था भएकाले चिनियाँ निर्माण कम्पनीले काम तदारुकताका साथ गरिरहेको खत्रीले बताए । ढिला गरेमा भने जरिवाना लाग्नेछ । अहिले कामको प्रगति देख्दा असारमा पानी झार्ने सकिने उनले दाबी गरे । उनले सुरुङभित्रको काम ‘फिनिसिङ’ को चरणमा पुगेकाले १० प्रतिशतमात्रै बाँकी रहेको बताए । 
     
    आयोजनाको सबै गरेर ९५ प्रतिशत काम सकिएको उनको भनाई छ । टनेलको मात्रै ९० र मुहान क्षेत्रको काम ६० प्रतिशत सकिएको छ । यही असोजमा १५ महिने ठेक्का सम्झौता भएको सिनोले १ महिनादेखि आयोजनाको बाँकी कामलाई तीव्रता दिइरहेको छ । दैनिक ३ सय कामदार र आवश्यक मात्रामा मेशिनरी औजार परिचालन गरिएको छ । 
     
    आयोजनाको मुख्य संरचना साढे २६ किलोमिटर लामो सुरुङमार्ग छेडेको इटालियन ठेकेदार कम्पनी सीएमसीले ठेक्का तोडेपछि बाँकी काम सिनोले गरिरहेको छ । उसले मुहानस्थलमा हेडवक्र्स, अस्थायी संरचना, कफर्ड ड्यामको काम गरिरहेको छ । कार्यकारी निर्देशक खत्रीले सुरुङ ढलान गर्ने काम साढे दुई किलोमिटर बाँकी रहेको बताए । सुरुङमा २८ वटा गेट राख्नुपर्नेछ । 

    मुहानमा स्थायी संरचना हेडवक्र्स (इन्टेक) बन्न अझै १ वर्ष लाग्ने भएकाले तत्काल अस्थायी ड्याम बनाएर पानी पठाउन लागिएको छ । सिनोले सुरुङको बाँकी काम गर्न ८५ करोड र १ अर्ब २ करोडमा हेडवक्र्सको ठेक्का पाएको आयोजनाले जनाएको छ । असोजमा गरिएको सम्झौता अनुसार १५ महिनाभित्र दुवै काम सक्नुपर्नेछ । 
     
    मेलम्चीको पानी पिउने उपत्यकावासीको दुई दशक लामो सपना हो । सरकारले २०५५ बाट मेलम्चीको काम अघि बढाएको थियो । साढे २६ किलोमिटर सुरुङ खन्नुपर्नेमा झण्डै ६ किलोमिटर मात्र खनेर सन् २००९ मा चिनियाँ ठेकेदार कम्पनी चाइना रेल्वेले ठेक्का तोडेको थियो ।

    बाँकी काम गर्न ठेक्का पाएको इटालियन ठेकेदार कम्पनी सीएमसीले आफ्नै कारणले गत वर्षको पुसमा आयोजना छोडेकाले सरकारले ठेक्का तोडेको थियो । यहाँ २०७४ चैतमा सुरुङमार्ग छेडिएको थियो । 

    अहिले मुहान क्षेत्रमा चिनियाँ २० र नेपाली १२० कामदारले काम गरिरहेका छन् । कुल गरेर ३०० कामदार परिचालन छन् । जसमा ७० जना चाइनिज रहेका छन् । 
     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast