मंगलवार, फागुन ६, २०७६
    धर्म-संस्कृति

    रामजानकी विवाह महोत्सव : १०८ जोडीको विवाह एउटै मण्डपमा

    मंगलवार, १० मंसिर २०७६, आहाखबर

    जनकपुरधाम, १० मङ्सिर 

    साताव्यापी कार्यक्रमसहित मनाउन लागिएको रामजानकी विवाहोत्सवको सम्पूर्ण तयारी पूरा भएको छ । 

    मंसीर १५ गते मनाइने विवाहोत्सवको सम्पूर्ण तयारी पूरा भएको भन्दै जानकी मन्दिरका पुजारी (छोटे महन्थ) रामरोशन दासले मंगलबारदेखि औपचारिक रुपमा कार्यक्रमहरु सुरु हुने जानकारी दिएका छन् ।

    ‘सरसजावट, पण्डाल–टेन्टसहित विवाहोत्सवको सम्पूर्ण तयारी पूरा भएको छ,’ जानकी मन्दिरका पुजारी दासले भने, ‘विवाहपञ्चमी सफल पार्न हामी अहोरात्र जुटेका छौँ, मंगलबारदेखि विधिवत् कार्यक्रमहरु सुरु हुँदैछ  ।’

    विवाहोत्सवअन्तर्गत मंगलबार जनकपुर दर्शन कार्यक्रम हुँदैछ। उत्तराधिकारी महन्त दासले यस वर्ष विवाहोत्सव मनाउन विशेष तयारी गरिएको जानकारी दिए । हरेक पाँच वर्षपछि अयोध्याबाट विशेष जन्ती आउने गरेको र यस वर्ष पाँचौ वर्ष परेकोले विवाहोत्सव विशेष रुपले मनाइने उनले बताए ।

    २०६१ सालदेखि हरेक पाँच वर्षपछि अयोध्याबाट विशेष जन्ती आउने परम्पराको सुरुवात भएको हो । यस वर्ष विशेष जन्तीको रुपमा अयोध्याबाट पाँच सयको संख्यामा जन्तीको रुपमा साधुसन्तहरु आउन लागेको दासले जानकारी दिए ।

    विवाहोत्सवमा सहभागी हुन अयोध्याबाट साधुसन्तहरु प्रस्थान गरिसकेको र बुधबार जनकपुरधाम पुग्ने उनले बताए । वैवाहिक कार्यक्रमहरु मिथिलाको परम्परा अनुसार नै हुने पनि उनले स्पस्ट परेका छन ।

     

    भारत र नेपाल बाट गायक गायिका 

    वैवाहिक गीत गाउन भारत र नेपालका झन्डै एक दर्जन लोक गायकलाई पनि आमंत्रण गरिएको छ । भारत बाट लोक गायिका पूनम मिश्र , लोक गायक कुंजविहारी मिश्र आउने पक्का भएको छ । त्यस्तै नेपाल बाट सुनील मल्लीक, संगीता देव , ललित कामत , नवीन मिश्र सहितका गायका र गायिकाले विवाहमहोत्सवमा मैथिली लोक भाकाको गीत गाउने मूल आयोजक जानकी मन्दिरले पत्रकार सम्मेलन ग़री जानकारी गराएका छन ।


    राष्ट्रपति भण्डारीले जन्तीको स्वागत गर्ने

    रामजानकी विवाहोत्सवमा सहभागी हुन राष्ट्रपति विद्यादेवी भण्डारी जनकपुर आउने भएकी छिन्। भारतको अयोध्याबाट आउने जन्तीलाई राष्ट्रपति भण्डारीले स्वागत गर्ने कार्यक्रम रहेको बताइएको छ।

    जनकपुरको बाह्रविघा मैदानमा आयोजना हुने एक कार्यक्रमका बीच राष्ट्रपति भण्डारीले अयोध्याबाट आउने जन्तीहरुलाई स्वागत गर्ने कार्यक्रम तय भएको दासले जानकारी दिए।

    जन्ती स्वागत कार्यक्रमअन्तर्गत प्रदर्शन हुने जानकी लिला कार्यक्रममा समेत राष्ट्रपति भण्डारी सरिक हुने कार्यक्रम रहेको उनले बताएका छन्।

    पुजारी दासले विवाहोत्सवमा सहभागी हुन भारतका गृहमन्त्री अमित शाह, रक्षामन्त्री राजनाथ सिंह, उत्तर प्रदेशका मुख्यमन्त्री योगी आदित्यनाथलाई निमन्त्रणा दिए पनि हालसम्म टुंगो नलागेको बताए।


    १०८ जोडीको सामूहिक विवाह

    विवाहोत्सवको अवसर पारेर एउटै मण्डपभित्र १०८ जोडी वरकन्याको सामूहिक विवाह हुने भएको छ । 

    जनकपुरस्थित मणिमण्डपमा विवाहपञ्चमीका दिन १०८ जोडी वरकन्याको सामूहिक विवाह हुने कार्यक्रम रहेको बताइएको छ। विस्वहिन्दू परिषद् र मनिमंडप समितिको विशेष संयोजनमा एउटै मंचमा २१६ जना नव वर बधूलाई राखिने समितिका संयोजक नारायण राउतले जानकारी दिए  ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast