शनिबार, मंसिर २८, २०७६
    राज्य-समाज

    'वार रुम' बाटै गरे प्रधानमन्त्री ओलीले जलविद्युतको उद्घाटन

    सोमबार, २ मंसिर २०७६, आहाखबर

    काठमाडौँ, २ मङ्सिर

    प्रधानमन्त्री केपी शर्मा ओलीले ६० मेगावाटको माथिल्लो त्रिशूली थ्री ‘ए’ जलविद्युत् आयोजनाको औपचारिक उद्घाटन गरेका छन् । 

    प्रधानमन्त्री  ओलीले प्रधानमन्त्री तथा मन्त्रिपरिषदको कार्यालयमा रहेको ‘वार रुम’ बाट र ऊर्जा, जलस्रोत तथा सिंचाइ मन्त्री वर्षमान पुनले आयोजनास्थल नुवाकोटको किस्पाङ गाउँपालिका–५ सिम्ले पुगेर एकसाथ उद्घाटन गरेका हुन् ।

    आयोजनाको पहिलो र दोस्रो युनिटबाट क्रमशः गत जेठ ३  र साउन १७ बाट परीक्षण उत्पादन सुरु भएको थियो । आज उद्घाटन भएसँगै आयोजनाबाट व्यवसायिक रुपमा विद्युत् उत्पादन सुरु हुनेछ ।

    यो आयोजनाले दिनमा १४ लाख ४० हजार युनिट बिजुली उत्पादन गर्न सक्ने प्राधिकरणले जनाएको छ । लोड सेन्टर काठमाडौं उपत्यकाबाट नजिक रहेको र हिउँदमा समेत करिब ४५ मेगावाट विद्युत् उत्पादन हुने भएकाले यसबाट काठमाडौं उपत्यकाको विद्युत् आपूर्ति प्रणालीलाई सन्तुलनमा राख्न ठूलो मद्दत पुग्ने विश्वास गरिएको छ ।

    यस आयोजनाले मुलकभित्र खपत हुने ऊर्जामा करिब ८ प्रतिशत योगदान दिनेछ  । यसबाट मुख्यरुपमा हिउँदको विद्युत् माग धान्न भारतबाट आयात हुने ऊर्जा घट्नेछ ।

    नेपाल सरकार तथा नेपाल विद्युत प्राधिकरणको लगानी र चिनियाँ सरकारको सहुलियतपूर्ण ऋणमा निर्माण भएको आयोजनाको अनुमानित लागत  १४ अर्ब ४३ करोड रुपैयाँ रहेको थियो । निर्माण अवधिको २ अर्ब ८९ करोड व्याजसहित १७ अर्ब ३२ करोड रुपैयाँमा आयोजना निर्माण सम्पन्न भएको हो ।

     

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast