आईतवार, मंसिर २२, २०७६
    अावास-निर्माण

    गौतमबुद्ध क्रिकेट रंगशालाको निर्माण तीव्र गतिमा, ८० जना मजदुर निरन्तर खटिँदै

    आईतवार, १ मंसिर २०७६, आहाखबर

    नवलपुर, १ मंसिर ।

    चितवनको भरतपुरमा निर्माण भइरहेको गौतमबुद्ध अन्तर्राष्ट्रिय क्रिकेट रंगशाला निर्माणको कामले तीव्रता पाएको छ ।

    क्रिकेट मैदान सम्याउने र नाली निर्माणको काम तीव्रगतिमा अगाडि बढिरहेको छ ।

    रंगशालाको निर्माण समयमै सम्पन्न गर्नका लागि काम युद्धस्तरमा अगाडि बढिरहेको धुर्मुस–सुन्तली फाउन्डेसनका अध्यक्ष सीताराम कट्टेल ‘धुर्मुस’ले बताए । रंगशालाको निर्माणका लागि आफू दिनरात खटिएको बताएका छन् । बिहान ६ बजेदेखि राति १० बजेसम्म रंगशाला निर्माणको काममा जुटेको धुर्मुसको भनाइ छ । 

    नवलपुरको गैंडाकोटमा शनिवार सञ्चारकर्मीसँग कुराकानी गर्दै धुर्मुसले क्रिकेट मैदान सम्याउने काम अगाडि बढिरहेको जानकारी दिए । ‘अहिले राति अबेरसम्म पनि रंगशाला निर्माणको काममा जुटिरहेका छौं,’ उनले भने । 

    मैदान सम्याउने र नालीको काम पूरा भएपछि पक्की निर्माणको काम अगाडि बढाउने उनले बताए । हाल कम्तीमा पनि ८० कामदार खटिएर नाली निर्माणका लागि डीपीसीको काम भइरहेको कट्टेलले बताए । क्रिकेट मैदानका लागि जमिनको सतहबाट २ फिट उचाइमा माटो उठाउनुपर्ने भएकाले माटोलाई रोलरले पेल्दै सम्याउँदै अगाडि बढिरहेको कट्टेलको भनाइ छ ।

    ‘क्रिकेट मैदानका लागि मुख्य मैदान निर्माणसँगै क्रिकेट अभ्यासका लागिसमेत मैदान तयार गरिरहेका छौं,’ उनले भने, ‘रंगशाला हेर्नका लागि आउने र खेल्नका लागि आउनेका लागि क्रिकेट मैदानको ‘स्याम्पल’ बनाएका छौं, यसरी हामीले रंगशाला निर्माणको काम अगाडि बढाएका छौं ।’

    खेल्नका लागि योग्य मैदान चाँडै नै निर्माण हुने जानकारी दिँदै धुर्मुसले स्रोत व्यवस्थापन भएको अवस्थामा २२ महिनाभित्रमा सम्पूर्ण संरचनासहित रंगशाला निर्माण पूरा गर्न सकिने बताए ।

    क्रिकेट रंगशाला समयमै निर्माण सम्पन्न गर्नका लागि सबै नेपाली अभियान्ता बनेर तन, मन र धनले सहयोग गर्नुपर्ने उनको भनाइ छ । भरतपुरमा निर्माण भइरहेको अन्तर्राष्ट्रिय क्रिकेट रंगशालाका लागि सहयोग गर्न गैंडाकोट नगरपालिकामा नगरस्तरीय सहयोग समिति बनेको छ । नगर उपप्रमुख विष्णुकुमारी कँडेलको संयोजकत्वमा नगरस्तरीय सहयोग समिति निर्माण गरिएको हो ।

    करीब २ अर्ब ६० करोड लागतमा चितवनको भरतपुर–१५ मा रहेको कृषि तथा वन विश्वविद्यालय परिसरमा गौतमबुद्ध अन्तर्राष्ट्रिय क्रिकेट रंगशाला निर्माण भइरहेको छ । २० बिघा ६ कट्ठा क्षेत्रफलमा निर्माण भइरहेको अत्याधुनिक सुविधासम्पन्न रंगशालामा २५ हजार दर्शक क्षमताको हुनेछ ।

    नेपालको मौलिकतासहित निर्माण हुन लागेको रंगशाला स्तुपा आकारको हुनेछ भने क्रिकेट मैदान फुलेको कमल फूल आकारको हुने जनाइएको छ ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast