शनिबार, मंसिर २८, २०७६
    मुभी-थिएटर

    दीपकराजको दाबी : ‘छ माया छपक्कै’ यस वर्षकै सबैभन्दा धेरै कमाउने फिल्म

    बिहिवार, २८ कार्तिक २०७६, आहाखबर

    काठमाडौँ, २८ कात्तिक 

    गत असोज २४ गते प्रदर्शनमा आएको फिल्म ‘छ माया छपक्कै’ ले यस वर्ष सबैभन्दा बढी कमाइ गरेको अभिनेता दीपकराज गिरीले बताएका छन् ।

    असोज ३ मा प्रदर्शनमा आएको चलचित्र ‘कबड्डी ३’ लाई पनि यस वर्ष सर्वाधिक कमाउने ब्लकबस्टर फिल्म भएको कबड्डी टिमले दाबी गरेको थियो ।

    गिरीका अनुसार ‘छ माया छपक्कै’ वर्षकै सर्वाधिक कमाइ गर्ने चलचित्र बन्न सफल भएको छ । यद्यपि उनले फिल्मले कति कमाइ गर्‍यो भन्ने चाहिँ खुलाएका छैनन् ।

    निर्माण टिम स्रोतका अनुसार फिल्मले १४ करोडको हाराहारीमा व्यापार गरेको छ । यद्यपि नेपालमा अझै पनि कागजी हिसाब देखाइने कारणले गर्दा कति कमाइ गर्‍यो भनेर यकिनका साथ भन्न सकिने अवस्था छैन ।

    ‘भारतबाट हिन्दी फिल्म किनेर ल्याएर नेपाली फिल्मलाई शोहरु कम दिन हलहरुलाई दबाब सिर्जना गर्ने वितरकका कारण हामीले पर्याप्त शोहरु नपाउँदा नपाउँदै पनि ‘छ माया छपक्कै’ यो वर्षकै सबैभन्दा बढी ग्रस कलेक्सन गर्न चलचित्र बनेको छ,’ गिरीले भने ।

    फिल्मबाट आर्जन गरेको रकमको केही हिस्सा सामाजिक सञ्जालमा लगाइने उनले बताएका छन् । उनले भविष्यमा अझै राम्रो चलचित्र निर्माण गर्ने भन्दै दर्शकलाई धन्यवाद समेत दिएका छन् ।

    फिल्मको कुरा गर्नुपर्दा ‘छ माया छपक्कै’ मा केकी अधिकारी, दीपकराज गिरी, जितु नेपाल, केदार घिमिरे, सुपुष्पा भट्ट, प्रकाश घिमिरे लगायतका कलाकारको अभिनय छ ।राजनीतिक विषयलाई कमेडी शैलीमा प्रस्तुत गरिएको यो फिल्मलाई दीपेन्द्र लामाले निर्देशन गरेका हुन् । 

    चलचित्रले बक्स अफिसमा राम्रो व्यापार गरेको छ समीक्षा पनि सकारात्मक पाएको थियो ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast