शुक्रबार, मंसिर २७, २०७६
    राज्य-समाज

    मन्त्रिपरिषद पुनर्गठनमा को–को पर्दैछन् ? को बन्दैछन् मन्त्री ?

    बुधबार, २७ कार्तिक २०७६, आहाखबर

    २७ कात्तिक, काठमाडौं । 

    सत्तारुढ नेपाल कम्युनिष्ट पार्टी (नेकपा)का प्रधानमन्त्री केपी शर्मा ओलीले अर्का अध्यक्ष प्रचण्डसहित शीर्षनेताहरुसँगको परामर्शपछि अर्को साता मन्त्रिपरिषद पुनर्गठन गर्ने भएका छन् । 

    नेकपा स्रोतका अनुसार महासचिव विष्णु पौडेल सरकारमा नजाने भएका छन् । उनले प्रधानमन्त्री तथा दुबै अध्यक्षलाई आफू पार्टी सञ्चालनको जिम्मेवारीमै रहने भन्दै मन्त्री नबन्ने आशय व्यक्त गरिसकेको प्रधानमन्त्री निकट स्रोतले जनाएको छ ।

    पछिल्लो समय नेकपा पंक्तिमा महासचिव पौडेल अर्थमन्त्री हुने चर्चा चलेको छ । ओलीको पहिलो कार्यकालमा सफल अर्थमन्त्री बनेका र पार्टीको जनमत बढाउने खालेको बजेट ल्याएकार कारण लोकप्रिय बनेका पौडेललाई यसपटक पुनः अर्थमन्त्री बनाउने अनुमान गरिएको थियो ।

    महासचिव पौडेल सरकारमा नजाने भएपछि नेकपा स्थायी कमिटी तहका नेतालाई पुनर्गठनमा पारिने भएको छ । प्रधानमन्त्री निकट स्रोतका अनुसार यसपटकको पुनर्गठनमा सुरेन्द्र पाण्डे, घनश्याम भुसाल, देवेन्द्र पौडेल र जनार्दन शर्मा मन्त्री बन्नेछन् ।

    उपसभामुख शिवमाया तुम्बाहम्फेलाई पनि मन्त्री बनाउने जानकारी प्रधानमन्त्रीले पार्टी नेताहरुलाई गराएका छन् । यसपटक मन्त्री बन्ने निश्चित भएका बसन्त नेम्वाङ पनि छन् । २०४८ सालदेखि नै पाँचथरबाट चुनाव जितेका नेम्वाङ पहिलोपटक मन्त्री बन्दैछन् ।

    यी बाहेक छविलाल विश्वकर्मा, अग्निप्रसाद सापकोटा, पम्फा भुसाल, कृष्णगोपाल श्रेष्ठ, रामेश्वर यादव, प्रेमबहादुर आले, किसान श्रेष्ठ, यज्ञराज सुनुवार र पार्वत गुरुङ लगायतका नेताहरुमध्येबाट केही अनुहार मन्त्रिपरिषदमा सामेल हुने नेकपाको उच्च स्रोत बताउँछ ।

    प्रधानमन्त्री ओली, अध्यक्ष प्रचण्ड र महासचिव पौडेल लगायतका नेता अर्थमन्त्रीमा डा.युवराज खतिवडालाई नै निरन्तरता दिन एकमत रहेका छन् । माघमा राष्ट्रियसभा सदस्यको २ वर्षे कार्यकाल सकिन लाग्दा खतिवडा पुनर्गठनमा हटाइने चर्चा चलिरहेको छ । तर, उनी अर्थमन्त्री नै रहने नेकपाको उच्च स्रोतले जनायो ।

    प्रधानमन्त्री ओलीले मन्त्रिपरिषद पुनर्गठन गर्दा कृषिमन्त्री चक्रपाणि खनाल, महिला वालवालिका तथा समाज कल्याण मन्त्री थममाया थापा, युवा खेलकुद मन्त्री जगत विश्वकर्मा, भौतिक पूर्वाधारमन्त्री रघुवीर महासेठ र उद्योगमन्त्री मात्रिका यादवलाई विदा दिने जानकारी नेताहरुलाई गराएका छन् ।

    श्रममन्त्री गोकर्ण बिष्ट, सामान्य प्रशासनमन्त्री लालबाबु पण्डित, वनमन्त्री शक्ति बस्नेत लगायतको सन्दर्भमा भने छलफल चलिरहेको उच्च स्रोतले जनाएको छ ।

    उपेन्द्र यादव सरकारबाट बाहिरिए भने दुई मन्त्रालयमा पनि नेकपाकै सांसदले मौका पाउनेछन् ।

    नेकपा स्रोतले भन्यो, कतिपय मन्त्रीको जिम्मेवारी हेरफेर हुनेछ । कम्तिमा ६/७ जना मन्त्रीलाई विदा दिएर केही अनुभवी र केही नयाँलाई जिम्मेवारी दिने गरी छलफल भइरहेको छ । सम्भवतः उपचुनावअघि नै एक साताभित्रमा प्रधानमन्त्रीले मन्त्रिपरिषद पुनर्गठन गर्नुहुन्छ, नेतृत्व तहमा सहमति भइसकेको छ ।

    दुई वर्षअघि नै प्रधानमन्त्री ओलीले मन्त्री बन्न आग्रह गर्दा पार्टीको जिम्मेवारी मागेका विष्णु पौडेल महासचिवको जिम्मेवारीमा केन्द्रित हुने उनी निकटस्थहरु बताउँछन् । पौडेल र सुवास नेम्वाङ दुवै नेताले आफूलाई मन्त्री नबनाउन प्रधानमन्त्रीसँग यसअघि नै आग्रह गरेका थिए ।

    कम्तिमा ६ जना मन्त्री हट्दा केही प्रभावशाली नेताहरु सरकारमा सहभागी हुनेछन् ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast