आईतवार, मंसिर १, २०७६
    आर्थिक खबर

    ३ महिनामा निर्यातमा १४ प्रतिशतले वृद्धि ! व्यापार घाटा १० प्रतिशत !!

    शनिबार, १६ कार्तिक २०७६, आहाखबर

    काठमाडौं, १६ कात्तिक 

    चालू आर्थिक वर्षको तीन महिनासम्मको अवधिमा निर्यातमा सुधार आएको देखिएको छ । असोज महिनासम्मको निर्यात १४ प्रतिशतले वृद्धि भएको छ ।

    भन्सार विभागको असोज मसान्तसम्मको तथ्यांकअनुसार निर्यात १४ प्रतिशतले बढेको छ भने व्यापार घाटा १०.३४ प्रतिशतले घट्न पुगेको छ ।

    नेपालबाट सबैभन्दा धेरै गलैंचा, पश्मिनाजन्य सामान भारत, चीन, पाकिस्तान, जर्मनी, अमेरिकालगायतका देशमा निर्यात हुने गरेको छ ।

    विभागको तथ्यांकअनुसार चालू आर्थिक वर्षको तीन महिनामा निर्यातमा १४.४१ प्रतिशतले वृद्धि भइ २७ अर्ब १६ लाख रुपैयाँ पुगेको छ । अघिल्लो वर्षको सोही अवधिमा निर्यात २३ अर्ब ७४ करोड थियो ।

    यसै अवधिमा व्यापार घाटासमेत १० प्रतिशतले घटेर तीन अर्ब सात करोडमा सीमित भएको जनाइएको छ । अघिल्लो वर्ष सोही अवधिमा व्यापार घाटा तीन अर्ब ४९ करोड पुगेको थियो ।

    यस अवधिमा नेपालबाट सबैभन्दा बढी पाम आयल निर्यात भएको छ । पाम तेल पाँच अर्ब ७५ करोडको निर्यात भएको छ भने एक अर्ब ४७ करोड बराबरको सोयाबिन तेल निर्यात भएको विभागको तथ्यांक छ ।

    यसै अवधिमा एक अर्ब ९५ करोडको गलैंचा निर्यात भएको छ । ७७ करोड ६५ लाखको ऊनी धागो, ६८ करोडको जुटजन्य सामग्री, ७७ करोडको चिया निर्यात भएको विभागले जनाएको छ ।

    समीक्षा अवधिमा नेपालबाट मिक्स जुस ७४ करोडको तथा ५६ करोडको पश्मिना सल निर्यात भएको विभागको तथ्यांक छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast