शनिबार, कार्तिक ३०, २०७६
    कृषि-उर्जा

    तिहारमा विद्युतको माग १३ सय मेगावाट, प्राधिकरण भन्छ - 'टेन्सन' छैन

    बुधबार, ६ कार्तिक २०७६, आहाखबर

    काठमाडौं, ६ कात्तिक । 

    यसवर्षको तिहारमा १ हजार ३०० मेगावाट बराबरको विद्युत माग हुने नेपाल विद्युत प्राधिकरणले प्रक्षेपण गरेको छ ।

    तिहारमा विद्युत माग व्यवस्थापनका लागि प्राधिकरणले सव–स्टेसन तथा अन्य संरचनालाई पनि मर्मत सम्भार गरी तन्दुरुस्त हालतमा राखेको छ । प्राधिकरणले आफ्ना र निजी क्षेत्रका विद्युत गृहलाई समेत सोही अवस्थामा राख्न ध्यानाकर्षण गराइसकेको छ ।

    बत्ती नै बत्तीको पर्वका रुपमा रहेको तिहारमा कुनै पनि घरमा विद्युत नकाटियोस भनेर विशेष ध्यान दिइएको प्राधिकरणले जनाएको छ । प्राधिकरणले यसपटक भारतबाट नियमित रुपमा आइरहेको बाहेक थप विद्युत जरुरी नपर्ने बताएको छ ।

    मनसुन लामो समयसम्म रहेका कारण नदीमा जल सतह नघटेका कारण विद्युत आयोजनाबाट विद्युत उत्पादनमा कमी नआएको उल्लेख गर्दै आन्तरिक रुपमा नै विद्युत व्यवस्थापन गर्ने सोचमा प्राधिकरण रहेको छ ।

    प्राधिकरण अनुसार हाल प्राधिरणको आफ्नै उत्पादन ९ हजार ७७६ मेगावाट घण्टा विद्युत उत्पादन रहेको छ । यस्तै निजी क्षेत्रबाट १० हजार ७७१ मेगावाट घण्टा विद्युत उपलब्ध रहेको छ ।

    त्यस्तै भारतबाट २ हजार ५०२ मेगावाट घण्टा विद्युत आयात भइरहेको छ । हाल ट्रिपिङलगायतको समसया भने नरहेको पाइएको छ । प्राधिकरणको प्रणालीमा कूल २३ हजार ४९ मेगावाट घण्टा रहेको छ ।

    तिहारको समयमा ठूलो मात्रामा विद्युत् खपत गर्ने उद्योग तथा प्रतिष्ठान समेत बन्द हुने भएकाले घरायसी प्रयोगका लागि सोही विद्युत समेत उपलब्ध हुने प्राधिकरणको भनाइ छ ।

    यस्तै हाल नियमित रुपमा विद्युत उत्पादन भए पनि कुलेखानी जलविद्युत आयोजनाको विद्युत भारत निकासी भइरहेको छ । कुलेखानीको कूल १०६ मेगावाट विद्युत उत्पादन भइरहेको छ ।

    कुलेखानी पहिलोबाट ६० मेगावाट, दोस्रोबाट ३२ मेगावाट र कुलेखानी तेस्रोले हालै मात्र १४ मेगावाट विद्युत उत्पादन सुरु गरेको छ । कुलेखानी जलाशयको पानी भरिएको अवस्थामा प्राधिकरणले सो आयोजना समेत नियमित रुपमा चलाइरहेको छ । भारतबाट विशेष गरी ढल्केबर– मुजफ्फरपुर अन्तरदेशिय प्रसारण लाइनबाट असाध्यै कम मात्रामा १०० मेगावाटको हाराहारीमा मात्रै विद्युत आयात भइरहेको छ ।

    प्राधिकरणका अनुसार सबै आयोजना समेत पूर्ण क्षमतामा चल्ने भएकाले विद्युत माग व्यवस्थापनका लागि कुनै समस्या नपर्ने देखिएको छ । आवश्यक भएको खण्डमा मात्रै भारतबाट विद्युत् आयात गर्ने योजनामा प्राधिकरण छ ।

    राजधानी काठमाडौंलगायत प्रमुख शहरमा विद्युत व्यवस्थापनका लागि जगेडा कर्मचारी समेत राख्ने र समस्या आएको एकाध मिनेटभित्रै पुग्ने गरी व्यवस्थापन गरिएको छ ।

    गतवर्ष जस्तै विद्युत मागअनुसार नै व्यवस्थापनका लागि प्राधिकरणले आवश्यक तयारी गरेको जनाएको छ ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast