बिहिवार, कार्तिक २८, २०७६
    कृषि-उर्जा

    नेपालको ऊर्जा क्षेत्रमा लगानी गर्न अर्थमन्त्रीको आग्रह

    सोमबार, ४ कार्तिक २०७६, आहाखबर
    काठमाडौँ, ४ कात्तिक
     
    अर्थमन्त्री  डा युवराज खतिवडाले नेपालको ऊर्जा क्षेत्रमा लगानीका लागि अन्तरराष्ट्रिय मुद्रा कोषलाई आग्रह गर्नुभएको छ । विश्व बैंक समूह तथा अन्तरराष्ट्रिय मुद्रा कोषको संयुक्त वार्षिक बैठकको दोस्रो दिन बोर्ड अफ गभर्नरको प्लेनरी सेसनमा सहभागी हुँदै उहाँले नेपालमा निजी क्षेत्रमार्फत जलविद्युत्का अतिरिक्त पर्यटन, कृषि, शहरी पूर्वाधार लगायतका क्षेत्रमा समेत लगानी गर्न उहाँले आग्रह गर्नुभएको अर्थमन्त्रालयद्वारा आज जारी विज्ञप्तिमा उल्लेख छ ।
     
    आर्थिक विकासमा निजी क्षेत्रको भूमिका महत्वपूर्ण हुने बताउँदै उहाँले निजी क्षेत्रलाई थप सबल तथा सक्षम र प्रभावकारी बनाउन लगानीका क्षेत्रको विविधीकरण गर्नुपर्ने विषयमा जोड दिनुभएको अर्थ मन्त्रालयले जनाएको छ । 
     
    सो अवसरमा उहाँले पूर्वाधार विकासका लागि मध्यम तथा दीर्घकालीन अवधिको वित्त परिचालन गर्ने विषयमा ध्यानाकर्षण गराउनुभएको थियो । मन्त्रालयका अनुसार अर्थमन्त्री डा खतिवडाले आजै दक्षिण एशियामा सडक सुरक्षासम्बन्धी एक कार्यक्रममा मुख्य वक्ताका रुपमा सहभागिता जनाउँदै सडक सुरक्षाका लागि सडक निर्माणभन्दा अगाडि अपनाउनुपर्ने डिजाइन तथा इञ्जिनीयरिङ पक्ष, सवारी साधनको भारवहन क्षमता, सडक प्रयोगकर्ताको ज्ञानको स्तर, सवारी साधनका परीक्षण र यातायात क्षेत्रकोे नियमनजस्ता विषयमा ध्यान दिनु जरुरी रहेको बताउनुभएको थियो ।
     
    अन्तरराष्ट्रिय मुद्राकोष एशिया प्रशान्त विभागले आयोजना गरेको एक उच्चस्तरीय कार्यक्रममा सहभागी हुँदै उहाँले दक्षिण एशियाली मुलुकले जनसाङ्ख्यिक लाभ लिन थप रोजगारीको सिर्जना र श्रमको उत्पादकत्व बढाउन आवश्यक भएको उल्लेख गर्नुभयो ।
    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast