सोमबार, कार्तिक ४, २०७६
    स्वास्थ्य

    उपत्यकामा रेबिजका बिरामी बढे

    आईतवार, १२ असोज २०७६, आहाखबर

    काठमाडौँ, १२ असोज । 
    टेकुस्थित शुक्रराज सरुवा रोग तथा ट्रपिकल अस्पतालमा दैनिक दुई सय जना कुकुरले टोकेर रेबिजविरुद्धको सुई लगाउन आउने गरेका छन् । ‘‘दैनिक रूपमा दुई सयको सङ्ख्यामा रेबिजविरुद्धको सुई लगाउन आउनेको सङ्ख्याले पनि प्रष्ट हुन्छ । काठमाडौँ उपत्यकामा धेरै मानिसलाई कुकुरले टोक्ने गरेको छ । कोही व्यक्ति भने लक्षण देखिसकेपछि उपचारका लागि आउने गर्छन्,’’ अस्पतालका प्रवक्ता तथा प्रमुख कन्सलटेन्सी डा. अनुप बास्तोलाले
    जानकारी दिनुभयो ।

    उहाँले रेबिजविरुद्धको सुई लगाएमा रेबिजको कारण मानिसको मृत्यु नहुने जानकारी दिँदै कतिपय मानिसहरू कुकुरले टोकेको हो, केही हुन्न भन्दै घर बस्नाले मृत्युको मुखमा पुगेको बताउनुभयो ।
    अस्पतालका अनुसार सरुवा रोग अस्पतालमा मात्र वार्षिक ३० जनादेखि ४० जनाको रेबिजका कारण मृत्यु हुने गरेको छ । सरकारले निःशुल्क उपलब्ध गराउने सुई लगाएमा रेबिज नलाग्ने भन्दै उहाँले कुकुरले टोकेर सुई लगाउन नआउँदा कतिपयको मृत्यु हुने गरको जानकारी दिनुभयो ।
    यता इपिडिमियोलोजी तथा रोग नियन्त्रण महाशाखाकी डा. रोशिका श्रेष्ठले नेपालभर रेबिजका कारण वार्षिक एक सय जनाको मृत्यु हुने गरेको जानकारी दिनुभयो । उहाँले दुई लाखभन्दा बढी डोज ‘एन्टी रेबिज भ्याक्सिन’ खपत हुने गरेको जानकारी दिँदै रेबिजविरुद्ध व्यापक रूपमा जनचेतना जगाउनुपर्ने बताउनुभयो ।

    सरुवा रोग अस्पतालका प्रवक्ता डा. बास्तोलाले दिगो विकास लक्ष्य प्राप्तिका लागि सन् २०३० सम्म मानिसमा हुने रेबिजको मृत्युदर शून्यमा पु¥याउने लक्ष्य लिइएको बताउनुभयो ।

    यसैबीच विश्व रेबिज दिवस विभिन्न कार्यक्रमका साथ मनाइएको छ । हरेक वर्ष सेप्टेम्बर २८ का दिन विश्व रेबिज दिवस मनाउने गरिन्छ । यो वर्ष ‘‘खोप लगाऔँ, रेबिज उन्मूलन गरौँ,’’ भन्ने नाराका साथ विश्व रेबिज दिवस मनाइयो ।

    स्वास्थ्य तथा जनसङ्ख्या मन्त्रालयको इपिडिमियोलोजी तथा रोग नियन्त्रण महाशाखाले जाउलाखेलस्थित चिडियाखानामा जनचेतनामूलक कार्यक्रम गरी विश्व रेबिज दिवस मनाएको छ । सो अवसरमा विद्यार्थी तथा चिडियाखाना आउने व्यक्तिलाई रेबिजबारे जानकारी दिइएको थियो । महाशाखाकी जुनोटिक शाखाकी डा. रोशिका श्रेष्ठले विद्यार्थीलाई रेबिजबारे जानकारी
    दिनुभएको थियो ।

    रेबिजविरुद्व पहिलो पटक प्रभावकारी खोपको विकास गर्ने वैज्ञानिक लुई पास्चरको निधन भएको दिन सेप्टेम्बर २८ मा उहाँको योगदानलाई स्मरण गर्दै हरेक वर्ष रेबिज दिवस मनाउने गरिएको हो । रेबिज लागेका कुकुर, स्याल, बिरालोलगायत पशुको टोकाइबाट मानिस र अरू स्तनधारी प्राणीमा सर्ने रेबिज प्राणघातक रोग हो । डा. श्रेष्ठले रोगका जीवाणुहरू रोगी पशुको ¥यालमा रहने भएकाले त्यस्ता पशुले टोक्दा घाउसँगै मानिसको शरीरमा प्रवेश गरी रोग उत्पन्न गर्ने बताउनुभयो । गोरखापत्रबाट

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast