सोमबार, असोज ६, २०७६
    बिदेश

    सूचना चुहाएको आरोपमा ट्रम्पको सहायक म्याडलिन बर्खास्त

    शनिबार, १४ भाद्र २०७६, आहाखबर

    एजेन्सी, १४ भदौ

    अमेरिकी राष्ट्रपति डोनाल्ड ट्रम्पले आफ्नो सहायक म्याडलिन वेस्टराउटलाई पदमुक्त गरेका छन् । ट्रम्प पारिवारसँग सम्बन्धित सूचना चुहाएको आरोपमा उनलाई पदमुक्त गरिएको हो ।

    ट्रम्प राष्ट्रपति भएको पहिलो दिनदेखि नै वेस्टराउटले उनीसँगै ह्वाइटहाउसमा काम गर्दै आएकी थिइन् ।

    २९ वर्षीय म्याडलिन यही अगष्ट महिनामा छुट्टी मनाउन गएको बेला न्यूजर्सीको बर्कले ह्वाइट्स होटलमा केही पत्रकारसँग डिनरमा देखिएकी थिइन् । त्यतिबेला उनले मदिरा सेवन गरी ट्रम्पसँग आफ्नो पहुँच रहेको भन्दै धाक लगाएको सीबीएस न्यूजले जनाएको छ ।

    यसको जानकारी ट्रम्पसम्म पुगेपछि गत बिहीबार उनलाई हटाइएको हो । यद्यपि ह्वाइट हाउसले भने उनलाई हटाइएकोबारे जानकारी दिन इन्कार गरेको छ ।

    न्यूयोर्क टाइम्सले उक्त घटनाबारे सबैभन्दा पहिले समाचार प्रकाशित गरेको थियो । समाचारमा लेखिएको छ, ‘म्याडलिनलाई अब बर्खास्त गरिएको कर्मचारीको रुपमा हेरिने छ र कार्यालयमा आउन पनि रोक लगाइएको छ ।’

    अमेरिकी मिडियाका अनुसार म्याडलिनको कार्यकक्ष राष्ट्रपति ट्रम्पको कार्यकक्षको ठीक अगाडि थियो ।

    ह्वाइट हाउसका अधिकारीहरुले ट्रम्पप्रति म्याडलिनको वफादारीप्रति शंका व्यक्त गर्दै आएका थिए । एक पूर्वअधिकारीले सीबीएस न्युज च्यानलसँग भनेका छन्, ‘उनी पहिलो दिनदेखि नै जासुसी गर्थिन् । राष्ट्रपतिका आलोचकहरुको काम गराइदिनका लागि आफ्नो निकटतालाई उपयोग गर्थिन् ।’

    ह्वाइट हाउसको बारेमा छापिएका दुई पुस्तकमा ट्रम्पले चुनाव जितेपछि म्याडलिन दुःखी थिइन् र उनी रोएको देखिएको थियो । तर, त्यसको बाबजुद पनि १ लाख ४५ हजार डलर तलब पाउने गरी म्याडलिन ट्रम्पको सहायक पदमा नियुक्त भएको बीबीसीले लेखेको छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast