बिहिवार, असोज २, २०७६
    राज्य-समाज

    प्रचण्डको सक्रियता बढ्यो, ओली फर्कदा सकिएला त एकताका बाँकी काम ?

    आईतवार, ८ भाद्र २०७६, आहाखबर

    काठमाडौँ, ८ भदौ ।
    प्रधानमन्त्री केपी ओली उपचारका लागि सिंगापुर गएसँगै नेपाल कम्युनिस्ट पार्टी (नेकपा)का अध्यक्ष पुष्पकमल दाहालको सक्रियता बढेको छ । पार्टी एकताको बाँकी काम टुंगो लगाउनका लागि उनको सक्रियता बढेको जानकारहर बताउँछन् । सिंगापुर जानु अघि ओलीले पार्टी एकताको बाँकी काम गर्ने गरी दाहाललाई अख्तियारी दिएका थिए ।

     

    तत्कालीन एमाले र माओवादी केन्द्रबीच पार्टी एकता भएको १५ महिना बित्दा पनि पोलिटब्युरो कमिटी, आयोग, मञ्च, प्रवास कमिटीसहित केही केन्द्रीय सदस्यको कार्यविभाजन टुंगो लागेको छैन । यी विषयलाई टुंगो लगाउने गरी दाहालको सक्रियता बढेको नेकपा स्थायी कमिटीका सदस्य देवेन्द्र पौडेल बताउँछ ।
     

    सचिवालय, केन्द्रीय कमिटी, प्रदेश कमिटी र जनवर्गीय संगठनको नेतृत्व जिम्मेवारी बाँडफाँटलगायतका काम भने सम्पन्न भइसकेको छ । एकता भइसकेको संगठनलाई सक्रिय बनाउने र एकता हुन बाँकी कमिटीको टुंगो लगाउने विषयमै केन्द्रित भई अध्यक्ष दाहालले सक्रियता बढाएका हुन् ।

    पार्टीलाई बलियो बनाउन दाहालको दौडधुप बढेको पौडेलले बताए । पछिल्लो समय पार्टीका वरिष्ठ नेता माधवकुमार नेपालसँग छलफल गरेका अध्यक्ष दाहालले सचिवालयका अन्य नेतासँग समेत छलफल गरेका छन् ।

    सचिवालय सदस्यहरू वामदेव गौतम, नारायणकाजी श्रेष्ठ, ईश्वर पोखरेल, रामबहादुर थापा र महासचिव विष्णु पौडेलका साथै स्थायी कमिटीका सदस्यसँग दाहालले छलफल गर्ने गरी गृहकार्य अघि बढाएको उनको सचिवालयले जनाएको छ ।

    ‘एकताको केही बाँकी काम टुंगो लगाउने र अन्य कमिटीलाई कसरी सक्रिय बनाउने भन्ने विषयमै केन्द्रित भई अध्यक्ष दाहालले छलफल सुरु गरिसक्नुभएको छ,’ स्थायी कमिटी सदस्य पौडेलले भने, ‘पछिल्लो समय वरिष्ठ नेता माधव नेपालसँग छलफल गर्नुभएको छ । सचिवालयका अन्य नेतासँग पनि छलफल गर्ने बताउनुभएको छ ।’

    नेकपा अध्यक्ष एवं प्रधानमन्त्री केपी शर्मा ओलीले नियमित उपचारका लागि सिंगापुर जानुअघि अध्यक्ष दाहाललाई पार्टीको बैठक गर्ने, सर्वसम्मतिमा निर्णय गर्नेलगायतका जिम्मेवारी दिएका थिए ।

    नेकपा स्थायी कमिटीका सदस्य गणेश साहले एकताको बाँकी काम टुंगो लगाउँदै पार्टीले देशैभर जागरण अभियानको तयारी गरेको बताए । एकताको धेरै काम टुंगो लागिसकेको बताउँदै उनले केही बाँकी रहेका काम समेतलाई सकेर छिट्टै नै जागरण अभियानको घोषणा गरिने उनले बताए ।

    पार्टी एकतामै लामो समयसम्म समय बितेकाले आमनेपाली जनतालाई धेरै कुरा बताउन नसकिएको बताउँदै नेता साहले अभियानमार्फत पार्टी अब जनताबीच पुग्ने बताए । अभियानको क्रममा पार्टी एकता र सरकारको राम्रा कामको विषयमा जानकारी दिइनेछ ।
     

    अध्यक्ष दाहालले शुक्रबार वरिष्ठ नेता नेपालसँग दुई घण्टा छलफल गरेका थिए । प्रधानमन्त्री एवं अध्यक्ष ओलीसँग असन्तुष्ट वरिष्ठ नेता नेपाललाई फकाउँदै उनले एकताको बाँकी काम टुंगो लगाउने गृहकार्य थालेको बताइएको छ ।

    प्रधानमन्त्री ओलीको पार्टी एवं सरकार सञ्चालन शैलीप्रति असन्तुष्टि व्यक्त गर्दै नेता नेपालले सात बुँदे असहमति पत्र पार्टीमा बुझाएका छन् । गत बिहीबार बसेको सचिवालय बैठकमा समेत ओली र नेपालबीच चर्काचर्की भएपछि सम्बन्ध चिसिएको छ । ओली र नेपालबीच सम्बन्ध चिसिएसँगै दाहाल सक्रिय भएका हुन् ।
     

    तत्कालीन एमाले र माओवादी केन्द्रबीचको एकीकरणपश्चात् नेताहरूको जिम्मेवारी बाँडफाँटमा समेत असन्तुष्ट नेता नेपालले आफ्नो वरीयता हेरफेरमा चित्त दुखाएका छन् । स्रोतका अनुसार अध्यक्ष दाहालले स्थायी कमिटी र केन्द्रीय कमिटीको बैठक बोलाउने विषयमा छलफल गरेका छन् । तर, अध्यक्ष ओली स्वदेश फर्किपछि मात्रै स्थायी कमिटी र केन्द्रीय कमिटीको बैठक बस्ने स्रोतले जनाएको छ ।

    नेकपा स्रोतका अनुसार पोलिटब्युरो गठनका लागि तत्कालीन एमालेका तर्फबाट नामावली तयार भए पनि तत्कालीन माओवादी केन्द्रका तर्फबाट नामावली टुंगो लाग्न नसक्दा ढिलाइ भएको छ ।

    नेकपामा ४ सय ४१ सदस्यीय केन्द्रीय कमिटी छ । पार्टीको अन्तरिम विधानअनुसार केन्द्रीय कमिटीको एक तिहाइ अर्थात् १ सय ४७ जनाको पोलिटब्युरो कमिटी बनाउनुपर्छ । जसमा तत्कालीन एमालेलाई ८१ र माओवादीलाई ६६ जना भागबन्डा गर्ने सहमति शीर्ष नेताबीच यसअघि नै भइसकेको छ । यो समाचार राजधानीमा छ । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast