आईतवार, मंसिर २२, २०७६
    अावास-निर्माण

    १ करोडसम्मका सडक निर्माण आयोजनामा डोजर नचाउन सरकारकाे निर्देशन

    बिहिवार, २३ श्रावन २०७६, आहाखबर

    काठमाडौं, २३ साउन ।

    १ करोडसम्म बजेट भएका तथा साे भन्दा साना सडक तथा पूर्वाधार निर्माणका योजनामा डोजरकाे प्रयोग गर्न नपाइने भएको छ । सरकारले सबै स्थानीय तहलाई परिपत्र गर्दै १ करोड रुपैयाँसम्मका योजनामा डोजरको प्रयोग नगर्न निर्देशन दिएकाे हो ।

    सार्वजनिक क्षेत्रमा रोजगार प्रत्याभूत गर्ने गरी प्रधानमन्त्री रोजगार कार्यक्रमअन्तर्गत जारी निर्देशिकाअनुसार संघ, प्रदेश र स्थानीय सरकार सबैले १ करोडसम्मका आयोजनामा सम्भव भएसम्म मानवीय जनशक्तिकै प्रयोग गर्नुपर्ने छ ।

    कुनै आयोजनामा मानवीय जनशक्तिले मात्रै काम गर्न असम्भव भए तोकिएको प्राविधिक टोलीले सिफारिस गरेपछि मात्रै मेसिनको प्रयोग गर्न पाइने छ ।

    १ करोडसम्मका आयोजनामा आवश्यक पर्ने जनशक्ति स्थानीय तहमा हुने स्थानीय रोजगार सेवा केन्द्रबाट परिचालन गर्नुपर्ने पनि सरकारले सबै स्थानीय तहलाई जारी गरेको परिपत्रमा उल्लेख छ ।

    प्रधानमन्त्री रोजगार कार्यक्रमअन्तर्गत सरकारले सबै स्थानीय तहमा रोजगार सेवा केन्द्र गठन गरिसकेको छ । देशभरका सबै स्थानीय तहमा गठन भएका स्थानीय रोजगार सेवा केन्द्रमा हालसम्म करिब १७ लाख युवाले रोजगारीका लागि आफ्नो नाम दर्ता गराएका छन् ।

    अब स्थानीय, प्रदेश तथा संघीय सरकारले सञ्चालन गर्ने १ करोडसम्मका आयोजनामा ठेकेदारले नियुक्त गर्ने कामदारभन्दा स्थानीय रोजगार केन्द्रमा दर्ता भएका कामदारलाई काममा लगाउनुपर्ने छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast