शुक्रबार, मंसिर २७, २०७६
    अावास-निर्माण

    मार्तडी जोड्ने खारगडा खोलामा पुल नहुँदा आवतजावतमा समस्या

    बुधबार, २२ श्रावन २०७६, आहाखबर

    बाजुरा, २२ साउन

    जिल्लाको बडीमालिका नगरपालिका–९ र ३ को सदरमुकाम मार्तडी जोड्ने खारगडा खोलामा पुल नहुँदा रजालीका तरकारी किसानलाई मार्तडी आवतजावतमा समस्या हुने गरेको छ । 

    खोलामा पानीको बहाब बढेपछि आवातजावतमा समस्या हुने गरेको हो । खोलामा पुल नहुँदा जोखिम मोलेर यात्रा गर्नु परेको उनीहरुको गुनासो रहेको छ । नगरपालिकाले पुल निर्माणका लागि पहल गरेको बताए पनि काममा ढिलाइ हुँदा यो बर्खा पनि स्थानीयवासीले सास्ती भोग्नुपर्ने भएको छ ।

    सदरमुकाम मार्तडीका लागि ८० प्रतिशत तरकारी बडीमालिका नगरपालिका–३ रजालीबाटै आउने गरेको होटेल व्यवसाही र व्यापारीले बताउने गरेका छन् । पानी परेको दिन समयमै तरकारी बजार नपुग्दा किसानले घाटा बेहोर्नु परेको छ ।

    खोलाले स्थानीयवासीलाई वर्षेनी समस्या दिने गरेको छ तर स्थानीय निकाय भने यसबारे मौन देखिएको छ । पटक÷पटक पुल निर्माणका लागि माग गर्दासमेत निर्माण नगरिएको रजालीवासीको गुनासो छ ।  उच्च शिक्षाका लागि मार्तडी आउने विद्यार्थीलाई समेत सास्ती बेहोर्नु परेको स्थानीयवासी विनिता रावलले बताइन् ।

    उक्त बाटो भएर गौमुल गाउँपालिका–१ का स्थानीयवासीले पनि आवतजावत गर्ने गरेका छन् । समस्या भोग्न उनीहरु पनि बाध्य छन् । जसको मारमा बालबालिका, महिला र वृद्धवृद्धा बढिपरेका छन् । स्थानीयवासीले काठे पुल निर्माण गर्न प्रयास गरे पनि खोला फैलिएर बग्ने भएकोले दीर्घकालीन रुपमा समाधान हुन नसकेको तरकारी व्यवसायी डबल रोकायाले बताउनुभएको छ ।

    खोला सानो देखिए पनि सम्म परेको ठाउँमा ८० मिटर जति फैलिएर बग्ने गरेको छ । खोलाले छेउमै रहेका स्थानीयवासीका खेत पनि कटान गर्दै लिएर सखाप पारेको छ । त्यसका लागि तटबन्धको व्यवस्था पनि राज्यले गरेको छैन् । किसानले वर्षेनी माग गरेपनि वडा नगरपालिका नसुनेझै गर्ने गरेको उनीहरुको आरोप छ ।

    यता वडा अध्यक्ष वीरबहादुर रावलले बडीमालिका नगरपालिकालाई पटक÷पटक आग्रह गर्दा पनि बेवास्था गरेको बताउनुभएको छ । सदरमुकाम नजिकैको समस्या भएर पनि नगरले त्यति वास्ता नगरेको बताएका छन् । आगामी वर्ष आफैं वडाबाट भए पनि केन्द्र र प्रदेश सरकारसँग पहल गर्ने उनको भनाइ रहेको छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast