आईतवार, मंसिर २२, २०७६
    अावास-निर्माण

    भूकम्पबाट क्षतिग्रस्त ७० सरकारी भवन पुनःनिर्माण

    बुधबार, १५ श्रावन २०७६, आहाखबर

    काठमाडौँ, १५ साउन

    चारवर्ष अघिको भूकम्पबाट पूर्ण रुपमा क्षति भएका सरकारी र सार्वजनिक भवनमध्ये ७० वटाको पुनःनिर्माण सम्पन्न भएको छ । 

    सरकारी स्रोतबाट ३० र एशियाली विकास बैंक (एडिबी)को ऋण सहयोगमा बनेका ४० भवन निर्माण सम्पन्न भएको राष्ट्रिय पुनःनिर्माण प्राधिकरणले जनाएको छ । केन्द्रीय आयोजना कार्यान्वयन एकाइ (भवन) का आयोजना निर्देशक नवराज प्याकुरेलका अनुसार सरकारी स्रोतबाट पुनःनिर्माण भइरहेका बाँकी २१ भवन चालु आर्थिक वर्षमै सम्पन्न हुनेछन् ।
      
    एडिबीको ऋण सहयोगमा पुनःनिर्माण भइरहेका बाँकी २९ भवनको पुनःनिर्माण विसं २०७६ पुससम्ममा सम्पन्न भइसक्ने पनि उहाँले बताउनुभयो । पुनःनिर्माण तथा प्रवलीकरण गर्न बाँकी रहेका संरचना बनाउने प्रक्रिया थालिएको छ ।
     
    साझा प्रकाशन, गोरखापत्र संस्थान, रेडियो नेपालको भवनको सम्झौता सम्पन्न भएको छ भने सिंहदरबार पश्चिम ढोकाको दुवैतर्फका भवनको बोलपत्र आह्वान गरिएको छ । भारतीय ऋण (एक्जिम बैंकमार्फत्) सहयोगमा पुनःनिर्माण हुने ललितपुरस्थित एकीकृत प्रशासनिक भवनको सार्वजनिक खरीदको सूचना प्रकाशन भएको छ । 

    सोही ऋण सहयोगमा बन्ने गोरखा, सिन्धुपाल्चोक, लमजुङ, रसुवा, ओखलढुङ्गा तथा सोलुखुम्बुका कारागार भवन पुनःनिर्माणको प्रक्रिया अघि बढाउन गृहकार्य जारी छ । प्राधिकरणका प्रमुख कार्यकारी अधिकृत सुशील ज्ञवालीले सरकारी भवनसहित भूकम्पबाट क्षति भई बनाउन बाँकी संरचना समयमा पुनःनिर्माण गर्नका लागि योजना बनाएर अघि बढेको बताउनुभयो ।

    एकाई (भवन) का अनुसार ठूला सरकारी तथा सार्वजनिक भवनको प्रवलीकरणको काम पनि अघि बढेको छ । दक्षिण एशियाली क्षेत्रीय सहयोग सङ्गठन (सार्क) सचिवालयको प्रवलीकरण यसअघि नै सम्पन्न भइसकेको छ । सिंहदरबार मूल भवनको पश्चिम भागबाहेक तीनवटै खण्डको प्रवलीकरण जारी छ । पश्चिम भागको बोलपत्र प्रकाशित भएको छ । 

    त्यसैगरी, बाल मन्दिर, केशरमहल तथा केन्द्रीय कानून पुस्तकालय भवनको प्रवलीकरणको पनि बोलपत्र प्रकाशित भएको छ । राष्ट्रपति कार्यालय (शीतल निवास), यसअघि उपराष्ट्रपतिको कार्यालय रहेको बहादुर भवन एवं घण्टाघरसँग जोडिएको त्रिचन्द्र कलेज भवन पनि प्रवलीकरणको डिजाइन चरणमा छन् । नेपाल राष्ट्र बैंककै लगानीमा बालुवाटार र थापाथलीका भवनको निर्माण जारी छ ।
     
    राजधानीमा आज आयोजित समीक्षा कार्यक्रममा दिइएको जानकारी अनुसार भूकम्पबाट आंशिक क्षति भएका मर्मतयोग्य २५३ संरचनाको मर्मत सम्पन्न भएको छ । सरकारी भवनतर्फ हालसम्म रु आठ अर्ब २८ करोड खर्च भएको छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast