बिहिवार, असोज ३०, २०७६
    लेख/संवाद

    शब्द संसारको प्रस्तुतीमा ‘मञ्चविहीनको मञ्च’ शुभारम्भ, सर्जकहरुमा उत्साहको सञ्चार

    आईतवार, १२ श्रावन २०७६, - आहाखबर संवाददाता .

    काठमाडौं, १२ साउन । 

    सृजनात्मक लेखनलाई नियमित बाचनका माध्यमबाट अभिव्यक्त गर्ने उद्देश्यसहित ‘मञ्चविहीनको मञ्च’ कार्यक्रम शुभारम्भ गरिएको छ । शब्द संसारको प्रस्तुती रहेको उक्त कार्यक्रमको शनिबार प्रसिद्ध साहित्यकार युवराज नयाँघरेले उद्घाटन गर्नुभयो । 

    राजधानीको थापागाउँस्थित कुञ्ज थियटरमा कार्यक्रम ‘मञ्चविहीनको मञ्च’ लाई नयाँघरेले बेग्ले किसिमले शुभारम्भ गर्नुभएको थियो । कार्यक्रमका प्रमुख अतिथि समेत रहनुभएका नयाँघरेले महाकवी लक्ष्मीप्रसाद देवकोटाको शाकुन्तल महाकाव्यको सुरुका केही शब्द कोसेली सुनाएर कार्यक्रमको समुद्घाटन गर्नुभयो । 

    उद्घाटन कार्यक्रममा बिभिन्न सर्जकहरुले आ आफ्नो सृजनाको बाचन समेत गर्नुभयो । सो अवसरमा अनुराधा शर्मा, निर्मला बराल, प्रतिभा आचार्य, सरस्वती गिरी, रुमु न्यौपाने, शुष्मा खत्री रञ्जित, शारदा गुरुंग, हरिकृष्ण खतिवडा, प्रमिला बस्नेत, चकेन्द्र राई, पवित्रा दाहाल लगायतले आ-आफूले ल्याएका रचनाहरु उपस्थित श्रोता दर्शकमाँझ प्रस्तुत गर्नुभएको थियो । 

    यसअघिदेखि नै साहित्य रचना, वाचन तथा त्यससँग सम्बन्धित विविध कृयाकलापहरुमा सक्रिय रहँदै आउनुभएका गंगा खड्का, शान्ता पोखरेल, लिलामाया ढकाल र रेजु पोख्रेलको विशेष पहलमा यस कार्यक्रमको सुरुवात गरिएको हो । 

    विशेष गरी आफ्ना सृजना बाचनका लागि उचित स्थान र वातावरणको खोजी गरिरहेका नवसर्जकहरुलाई लक्षित गर्दै शब्द संसारमा आबद्ध ४ महिला सर्जकहरुको सक्रियतामा ‘मञ्चविहीनको मञ्च’ कार्यक्रमले एउटा आकार पाएको गंगा खड्काले जानकारी दिनुभयो ।

    यसप्रकारको अन्यन्तै उपयोगी कार्यक्रमलाई आफ्नै छत्रछायाँमा अघि सार्न पाउँदा आफूलाई अत्यन्तै सुख एवम् गर्वको अनुभूति भएको कार्यक्रमका संरक्षक समेत रहनुभएका कमल ढकालले उल्लेख गर्नुभयो । 

    साथै, यस कार्यक्रमलाई सबैको साझा चौतारीकारुपमा विकास गर्दै लाने तथा समयसापेक्षरुपमा सर्जकहरुको चाहना बमोजिम यसलाई अघि बढाउँदै लैजाने योजना रहेको उहाँको भनाई थियो । 

    यसैबीच, हरेक महिनाको दोश्रो शनिबार दिउँसो थापागाउँस्थित सिडिओटोलमा रहेको कुञ्ज थियटरमा सृजना बाचनको कार्यक्रम नियमित चल्ने जानकारी गराउँदै यसमा सहभागी भएर सबैले आ आफ्नो क्षमता प्रष्फुटन गर्न सक्ने शब्द संसारले जनाएको छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast