मंगलवार, असोज ७, २०७६
    ओएमजी Omg!

    नाम मिल्दा ६ वर्ष कैद सजाय, यसरी तिराइयो अर्काको नामको ८० हजार जरिवाना

    आईतवार, २९ आषाढ २०७६, आहाखबर

    काठमाडौँ, २९ असार । 
    ताप्लेजुङ मेरिङदेन–४ का ३७ वर्षीय गणेश हाङगाम लिम्बूले फरार अभियुक्तसँग नाम मिलेकै भरमा ६ वर्ष कैद भुक्तान गर्नुपर्ने भएको छ । प्रहरी र प्रशासनले नै आफूलाई फसाएको भन्दै उनी न्याय माग्न भौँतारिइरहेका छन् । 

    जिल्ला प्रशासन कार्यालय इलामले हातहतियार खरखजना मुद्दाका फरार अभियुक्त विक्रम भनिने गणेश लिम्बूविरुद्ध तोकेको ८० हजार रुपैयाँ जरिवाना लिम्बूले जेल पर्ने भयका कारण २१ भदौ ०७५ मा तिरेका थिए । त्यसैलाई आधार मान्दै अदालतले लिम्बूविरुद्ध ३१ वैशाख ०७६ मा ६ वर्ष कैद र ६७ हजार ८ सय ६० रुपैयाँ जरिवाना हुने फैसला गरेको हो । 

    अदालतको फैसलापछि हारगुहार गर्दै गृह मन्त्रालय पुगेका लिम्बूलाई अब न्याय माग्न जाने ठाउँ थाहा छैन । ‘जिप्रका इलामले भनेको विक्रम भनिने गणेश लिम्बू र म एउटै व्यक्ति होइन । मेरो नाम गणेश हाङगाम लिम्बू हो,’ उनले भने, ‘तर, प्रहरीले विक्रम भनिने गणेश लिम्बू मै भएको भन्दै समात्यो । जिप्रका इलामले फरार रहेका विक्रम भनिने गणेश लिम्बूकै नाममा ८० हजार रुपैयाँ जरिवाना तिर्न लगायो । त्यसैलाई आधार मानेर उच्च अदालत इलामले मविरुद्ध ६ वर्ष कैद र ६७ हजार ८ सय ६० रुपैयाँ जरिवाना हुने फैसला गर्‍यो । अब न्याय माग्न म कहाँ जाऊँ ?’

    यसरी तिराइयो जरिवाना 
    स्थायी घर ताप्लेजुङ मेरिङदेन–४ भएका गणेश हाङगाम लिम्बू पत्नी र बालबच्चासँगै ०६७ देखि काठमाडौं बस्दै आएका थिए । ठेलागाडामा पानीपुरी बेच्ने काम गरेका उनले पछिल्लो समय ट्याक्सी पनि चलाए । आम्दानीले धान्न नसक्ने भएपछि रोजगारका लागि इपिएस कोटामा दक्षिण कोरिया जाने मनस्थितिमा पुगे । कोरियन भाषा कक्षा लिए, परीक्षा दिए र नाम पनि निकाले । कोरिया जान जुटाउनुपर्ने कागजातमध्ये चारित्रिक प्रमाणपत्र पनि एक थियो । प्रमाणपत्र बनाउन उनी महाराजगन्जस्थित प्रहरी कार्यालय पुगे । निवेदन दिए, तर प्रमाणपत्र आए । 

    उनी सोध्न कार्यालयमै पुगे । त्यहाँ थाहा पाए, उनी प्रहरीको फरार सूचीमा पो रहेछन् । उनको आँखा तिलमिलायो । प्रहरीले उनलाई तत्काल हिरासतमा लियो । उनलाई भोलिपल्ट जिल्ला अदालत इलाम लगियो । त्यहाँ पुगेपछि मात्र उनले थाहा पाए, उनीसँग नाम मिल्ने विक्रम भनिने गणेश लिम्बूविरुद्ध हातहतियार तथा खरखजना मुद्दा लागेको रहेछ । अब अदालतमा विक्रम भनिने गणेश लिम्बू आफू नभएको प्रमाण पेस गर्नुपर्ने भयो । प्रमाण जुटाए । 

    भोलिपल्टै अदालतले ३० हजार रुपैयाँ धरौटी लिएर उनलाई तारेखमा छोड्यो । लगत्तै प्रहरीले उनलाई जिल्ला प्रशासन कार्यालय इलाम पु¥यायो । फरार विक्रम भनिने गणेश लिम्बू उनी नै भएको भन्दै जिप्रकाले विक्रमविरुद्ध तोकेको ८० हजार रुपैयाँ तिर्न भन्यो । सुरुमा उनले इन्कार गरे । रकम नतिरे जेल हालिने धम्की दिइयो । उनले परिवार सम्झे । दक्षिण कोरियाको रोजगारी सम्झे । त्यसैले उनी रकम तिरेर उम्किन चाहे । ऋण काढे र जरिवान तिरेर हिरासतमुक्त भए । 

    चारित्रिक प्रमाणपत्र लिन उनी फेरि प्रहरी कार्यालय पुगे । तर, प्रहरीले मुद्दा फैसला नभई नदिने बतायो । उनी फैसला कुर्न बाध्य भए । अन्ततः १ पुस ०७५ मा उनी र विक्रम भनिने गणेश लिम्बू एकै व्यक्ति नभएको फैसला अदालतले गर्‍यो । 

    फैसला लिएर उनी फेरि चारित्रिक प्रमाणपत्र लिन गए । प्रहरीले पुनः अस्वीकार गर्‍यो । ०७५ भदौबाट लागू भएको फौज्दारी संहिताका आधारमा मुद्दा स्वतः पुनरावेदन भएपछि उच्च अदालत इलामले उनीविरुद्ध नयाँ फैसला सुनुवाइ गर्‍यो । उच्च अदालतले विक्रम भनिने गणेश लिम्बूविरुद्ध तोकेको ८० हजार रुपैयाँ जरिवाना तिरेको अभियोगमा ३१ वैशाख ०७६ मा उनीमाथि ६ वर्ष कैद र ६७ हजार ८ सय ६० रुपैयाँ जरिवाना हुने फैसला गरेको छ । योसँगै उनको जीवनको सबै सपना तुहिन पुगेको समाचार नयाँ पत्रिकामा छ । 

    कसरी जुध्यो नाम ? 
    इलाम गजुरमुखीस्थित प्रकाश पुलामी मगरको घरमा ७ चैत ०६९ मा डाँका लाग्यो । डाँकामा संलग्न थिए सुसन भनिने राजेश चौधरी, राम लिम्बू, कृष्ण तामाङ र अभिषेक भनिने विक्रम दास । प्रहरीले राम र कृष्णलाई पक्राउ गर्‍यो । स्थानीयसँगको झडपमा विक्रम मारिए । पक्राउ परेकाहरूको बयानमा डाँकाको योजनाकार इलामका विक्रम लिम्बू रहेको खुल्यो । प्रहरीले विक्रमको खोजी गर्‍यो । तर, फेला पार्न सकेन । पक्राउ परेकालाई अदालतले कैद सजाय फैसला गर्‍यो । उनीहरू कैद साजय भुक्तान गरी अहिले जेलमुक्त भइसकेका छन् । 

    तर, योजनाकार भनिएका विक्रम भने फरार नै थिए । प्रहरीले मुद्दाको मिसिल बुझाउँदा विक्रम भनिने गणेश लिम्बू भनी उल्लेख ग¥यो । त्यसैको आधारमा प्रहरीले फरारको सूचीमा विक्रम भनिने गणेश लिम्बूको नाम चढायो । सोही सूचीका आधारमा महाराजगन्जस्थित प्रहरी कार्यलयमा चारित्रिक प्रमाणपत्र लिन गएका गणेश हाङगाम लिम्बू १९ भदौ ०७५ मा पक्राउ परे । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast