आईतवार, भाद्र ८, २०७६
    स्वास्थ्य

    एक वा दुई छोरी मात्रै जन्माएर परिवार नियोजन गर्ने दम्पतीलाई एक लाख पुरस्कार

    बुधबार, २५ आषाढ २०७६, आहाखबर

    कर्णाली, २५ असार । 

    जिल्लाको खाँडाचक्र नगरपालिकाले एक वा दुई छोरी मात्रै जन्माएर परिवार नियोजन गर्ने दम्पतीलाई एक लाख रुपैयाँ पुरस्कार दिने घोषणा गरेको छ । आगामी आर्थिक वर्ष ०७६/७७ को नीति तथा कार्यक्रममै नगरपालिकाले पुरस्कारको व्यवस्था गरेको छ ।

    छोरीको भ्रुणमै हत्या गर्ने वा छोराका लागि धेरै छोरी जन्माउने क्रम बढेपछि नीति तथा कार्यक्रममै पुरस्कारको व्यवस्था गरिएको नगरपालिकाकी उपप्रमुख विजया विष्टले बताइन् । ‘एक वा दुई छोरी मात्रै जन्माएर परिवार नियोजन गरे एक लाख पुरस्कार दिने व्यवस्था गरेका छौँ,’ उनले भनिन्, ‘छोरी नै छोरासरह भएको सन्देश दिन यस्तो कार्यक्रम ल्याइएको हो । यसले लैंगिक समानता कायम गर्दै छोरीको भ्रुणहत्या रोकिनेछ ।’

    छात्रवृत्ति प्रोत्साहनस्वरूप दिने यो रकमले अभिभावकलाई छोरी पढाउन सहज हुने विश्वास पनि नगरपालिकाको रहेको समाचार नयाँ पत्रिकामा छ । देशका विकट क्षेत्रमा छोराको रहरमा धेरै सन्तान जन्माउँदा आमाको ज्यानसमेत जोखिममा परेका धेरै घटना छन् ।

    कालिकोटमा यो दर झन् बढी रहेकाले रोक्न पहल गरिएको नगरप्रमुख जसीप्रसाद पाण्डेले बताए । ‘छोरा जन्माउने आसमा धेरै महिलाको ज्यान जोखिममा पर्ने गरेको छ । नयाँ कार्यक्रमले छोरी पनि छोरासरह हुन् भन्ने सन्देश जान्छ,’ उनले भने । 

    नगरपालिकाले आव ०७६/७७ का लागि ४९ करोड २६ लाखको बजेट ल्याएको छ । ५० लाख राजस्व उठाउने लक्ष्य राखिएको नगरप्रमुख पाण्डेले बताए । नगरपालिकाले कृषिमा प्रोत्साहन, नगदे बालीको उत्पादन वृद्धि, पर्यटकीय क्षेत्रको विकासलगायत क्षेत्रलाई बजेटमा समेटेको उनले बताए । ‘हामीले सुखी नेपाली, समृद्ध नेपाल’ नारालाई पहिलो प्राथमिकतामा राखेका छौँ,’ उनले भने, ‘नगरलाई सुखी र समृद्ध बनाउने हाम्रो प्राथमिकता हो ।’

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast