आईतवार, श्रावन ५, २०७६
    राज्य-समाज

    नेपाल पत्रकार महासङ्घको आन्दोलन फिर्ता

    मंगलवार, २४ आषाढ २०७६, आहाखबर

    काठमाडौँ, २४ असार 

    नेपाल पत्रकार महासङ्घले मिडिया काउन्सिल विधेयकविरुद्ध गर्दैै आएको आन्दोलनको कार्यक्रम फिर्ता लिएको छ । महासङ्घका महासचिव रमेश विष्टले नेपाल कम्युनिष्ट पार्टी (नेकपा)का नेता र महासङ्घका पदाधिकारीबीच आज सिंहदरबारमा मिडिया काउन्सिल विधेयकमा रहेको प्रेस स्वतन्त्रता विरोधी विषय संशोधन गर्ने सहमति भएपछि आन्दोलन फिर्ता गरिएको जानकारी दिनुभयो । 

    नेकपा संसदीय दलको कार्यालयमा आज उपनेता सुवास नेम्वाङ, नेकपाका महासचिव विष्णुप्रसाद पौडेल, राष्ट्रियसभामा नेकपाका नेता दीनानाथ शर्मा, कानून, न्याय तथा संसदीय मामिलामन्त्री भानुभक्त ढकाल, सांसद योगेश भट्टराईसमेतको उपस्थितिमा संसदीय दलका तर्फबाट राष्ट्रियसभामा नेकपाका प्रमुख सचेतक खिमलाल भट्टराईले संसद्मा दर्ता भएको मिडिया काउन्सिल विधेयकमा संशोधन प्रस्ताव तयार पारी महासङ्घले उठाउँदै आएको कुरालाई समेट्ने लिखित प्रतिबद्धता व्यक्त गरेको महासचिव विष्टले बताउनुभयो । काउन्सिलको स्वायत्तता, गठन प्रक्रिया, दण्डजरिवानालगायत सरोकारलाई सम्वोधन गर्ने प्रतिबद्धता नेताहरुले जनाएपछि आन्दोलनका कार्यक्रम फिर्ता लिइएको उहाँले बताउनुभयो । 

    ‘‘सरकारले दर्ता गरेको विधेयकका सन्दर्भमा सरकारको नेतृत्व गरिरहेको पाटीको संसदीय दलकै तर्फबाट प्रतिबद्धता व्यक्त भएको सन्दर्भमा महासङ्घ उक्त प्रतिबद्धताको स्वागत गर्दै कानून निर्माण गर्ने थलो जननिर्वाचित संसद्ले महाङ्घका सबै सरोकारहरुलाई सम्वोधन गर्ने विश्वास व्यक्त गर्दछ’’, विष्टले जारी गरेको विज्ञप्तिमा भनिएको छ”, महासङ्घले सञ्चालन गर्दै आएको तेस्रो चरणका सडक सङ्घर्षका बाँकी कार्यक्रमहरु स्थगन गरी सङ्घीय संसद्मा संशोधन प्रक्रियामार्फत महासङ्घले उठाएका विषयवस्तुलाई सम्बोधन गराउन छलफल, संवादजस्ता गतिविधिमार्फत दबाब सिर्जना गरिने गरिने छ ।’’

    महासङ्घले सरकारले  राष्ट्रियसभामा गत वैशाख २७ गते दर्ता गरेको मिडिया काउन्सिल विधेयकसहित समग्र सञ्चारसम्बन्धी विधेयकलाई प्रेस स्वतन्त्रतामैत्री बनाउने सन्दर्भमा दवावमूलक आन्दोलन सञ्चालन गर्दै आइरहेको थियो ।

    तपाईको समाचार, लेख /रचना वा सुझाव भएमा aahakhabar@gmail.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast