बुधबार, असोज १, २०७६
    पर्यटन समाचार

    नगरकोट पुग्ने पर्यटकलाई अब लाग्नेछ यति शुल्क

    मंगलवार, २८ जेष्ठ २०७६, आहाखबर

    काठमाडौँ, २८ जेठ । 
    नगरकोट पुग्ने पर्यटकले पुनः प्रवेश शुल्क तिर्नुपर्ने भएको छ । भक्तपुरको चाँगुनारायण नगरपालिका र काभ्रेको मण्डन देउपुर नगरपालिकाले संयुक्त रूपमा प्रवेश शुल्क उठाउने र संकलित रकम नगरकोटकै विकासमा खर्च गर्ने सहमति गरेका छन् ।

    आगामी आर्थिक वर्ष ०७६/७७ को साउनबाट प्रवेश शुल्क उठाउन दुई नगरपालिकाबीच सहमति भएको चाँगुनारायण नगरपालिकाका मेयर सोमप्रसाद मिश्रले बताए । उनका अनुसार अब सार्क क्षेत्रका पर्यटकले दुई सय ५० रुपैयाँ र सार्कबाहिरका पर्यटकले तीन सय ५० रुपैयाँ शुल्क बुझाउनुपर्नेछ ।

    आगामी वर्ष तीन करोड रुपैयाँ राजस्व संकलन हुने अनुमान गरेका छन् । ‘राजस्वका लागि दुई नगरपालिकाको संयुक्त खाता खोल्ने र संकलित रकमले नगरकोटमै पर्यटकीय पूर्वाधार खडा गर्ने सहमति भएको छ, टेन्डर लगाउन अनुमानित तीन करोड रुपैयाँ नघट्ने गरी प्रस्तावसमेत आह्वान गरिएको छ’ मिश्रले भने ।

    नगरकोट आउने पर्यटकबाट दुई नगरपालिकाले छुट्टाछु्ट्टै शुल्क उठाउने निर्णय गरी ठेक्का लगाएका थिए । तर, स्थानीय र व्यवसायीले दोहोरो कर लगाइएको भन्दै विरोध गरेपछि चाँगुनारायण नगरपालिकाले प्रवेश शुल्क लिने निर्णय फिर्ता लिएको थियो । 

    भक्तपुर, काठमाडौं र काभ्रेको सीमाक्षेत्र नगरकोटको अधिक भू–भाग चाँगुनारायण नगरपालिकामा पर्छ । तर, मण्डन देउपुर नगरपालिकाले भने चालू वर्षमा पनि सबै पर्यटकलाई प्रवेश शुल्कबापत तीन सय ३९ रुपैयाँ उठाइरहेको छ । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast