मंगलवार, भाद्र ३१, २०७६
    राज्य-समाज

    तस्कर र भष्ट्राचारीलाई निस्तेज पार्नुपर्छः गृहमन्त्री थापा

    सोमबार, ६ जेष्ठ २०७६, आहाखबर

    काठमाडौं, ६ जेठ ।
    गृहमन्त्री रामबहादुर थापाले तस्कर र भष्ट्राचारीलाई  निस्तेज पार्नुपर्ने बताउनुभएको छ । राष्ट्रिय प्रहरी प्रशिक्षण प्रतिष्ठान महाराजगंजमा सोमबार आयोजित कार्यक्रममा थापाले  राष्ट्र र नागरिकको सफलतापूर्वक सुरक्षा गर्ने नेपाल सरकारको मुख्य जिम्मेवारी रहेको उल्लेख गर्दै यस्तो जिम्मेवारीका लागि सहि सूचना संकलन गर्नुपर्ने बताउनुभयो ।

    कुनै पनि अपराधीलाई नियन्त्रण गर्न ठोस सूचना आवश्यक रहेको बताउँदै उहाँले सहि सूचना, यथार्थ एवम् ठोस प्रमाणको आधारमा सुरक्षा योजना तथा नीति निर्माण गर्न सकिने बताउनुभयो । राष्ट्रिय अनुसन्धान विभागको मुख्य जिम्मेवारी ठोस सूचना संकलन गर्नु रहेको बताउँदै गृहमन्त्री थापाले आगामी दिनमा सूचना संकलनको लागि अनुसन्धान विभागलाई प्रभावकारी रुपमा प्रस्तुत हुन निर्देशन समेत दिनुभयो ।  

    सरकारले राज्य व्यवस्थालाई उल्टाउन सक्रिय रहेका तत्वलाई निस्तेज र नियन्त्रण गर्ने नीति लिएको चर्चा गर्दै थापाले देशको अर्थतन्त्रको रक्षा र विकास गर्न आर्थिक अपराधमा संलग्न तस्कर, भष्ट्राचारीलाई नियन्त्रण एवम् निस्तेज पार्न जरुरी रहेको बताउनुभयो । उहाँले भन्नुभयो, ‘देशको राजनीतिक प्रणाली, अर्थतन्त्रको सुरक्षा, नागरिकले प्राप्त गरेका राजनीतिक अधिकार एवम् राष्ट्र र जनताको गरिमाको सुरक्षाका लागि हामीसँग भएका ज्ञान, सिप एवम् क्षमतालाई अभिवृद्धि गर्नुपर्छ ।’

    वर्तमान अवस्थामा विज्ञान र प्रविधि गुणात्मक रुपमा तीव्र विकास भइरहेको चर्चा गर्दै अपराधीहरुले प्रविधिको उच्च प्रयोग गर्दै आपारधिक क्रियाकलाप गर्दै आएको र त्यस्ता आपराधिक गतिविधिलाई निस्तेज गर्न प्रविधिको विकास गर्दै प्रविधि सम्बन्धी ज्ञान तथा सिप लगायतका बिषयहरु तालिममा समेत समावेश गर्नुपर्नेमा उहाँले जोड दिनुभयो । 

    उच्च प्रविधिको ज्ञान सँगसँगै सुरक्षाका जिम्मेवारीलाई वहन गर्न इमान्दरिता र अनुशासन अनिवार्य रहेको समेत उहाँले बताउनुभयो ।  

    कार्यक्रममा गृहसचिव प्रेम कुमार राईले राष्ट्रिय अनुसन्धान विभागका कर्मचारीहरुमा निखार ल्याउनका लागि तालिम संचालन गरिएको बताउँदै आउँदा दिनमा यस्ता तालिमलाई निरन्तर रुपमा संचालन गरिने बताउनुभयो । तालिम पश्चात सूचना संकलन तथा नेतृत्व गर्दा विगतको भन्दा प्रभावकारी रुपमा क्षमता प्रदर्शन हुने विश्वास उहाँले व्यक्त गर्नुभयो ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast