मंगलवार, भाद्र ३१, २०७६
    विज्ञान/प्रविधि

    नेपालको पहिलो भूउपग्रह असार २ मा अन्तरिक्षमा छोडिने, दैनिक १६ पटक पृथ्वी परिक्रमा

    सोमबार, ६ जेष्ठ २०७६, आहाखबर

    काठमाडौँ, ६ जेठ ।

    नेपालको पहिलो नानो स्याटलाइट ‘नेपाली स्याट वान’ असार २ मा अन्तरिक्षमा छोडिने भएको छ । अन्तरिक्षमा छोडेसँगै सो नानो भूउपग्रहले पृथ्वीको चक्कर काट्न थाल्नेछ ।

    नेपाल स्याट वान भूउपग्रह पृथ्वीका सतहभन्दा चार सय किलोमिटरमाथि अन्तरिक्षमा रहनेछ । प्रत्येक ९० मिनेटमा पृथ्वीका एक चक्कर चलाउने यसले दैनिक १६ पटक पृथ्वी परिक्रमा गर्नेछ । त्योमध्ये दैनिक चार पटक नेपालको आकाशमा आइपुग्नेछ ।

    १० सेन्टिमिटर लामो, १० सेन्टिमिटर चौडा र १० सेन्टिमिटर अग्लो भूउपग्रह मानिसका हातमा अटाउन सक्छ, यो १ किलो ३३० ग्रामको छ ।

    एन्टारेस रकेटले नेपालसँगै श्रीलंकाको ‘रावण वान’ र जापानको युगुइसीमा नामक नानो भूउपग्रहहरुलाई ७२ घण्टा लगाएर २०७६ वैशाख ८ गते केन्द्रमा पुर्‍याएको थियो । त्यसयता नेपाल स्याट वानलाई आइएसएसमै राखिएको छ ।

    नेपालको पहिलो भूउपग्रह अन्तरिक्षमा छोडिने दिन नेपाल विज्ञान तथा प्रविधि प्रज्ञा प्रतिष्ठान (नास्ट) ले सार्वजनिक कार्यक्रम गर्ने तयारी गरेको छ।

    जापान सरकारको बर्ड्स कार्यक्रम अन्तर्गत नानो भूउपग्रहहरु निर्माण भएका हुन् । ती उपग्रहहरु व्यवसायिक होइनन् । अध्ययन प्रयोजनका हुन् । नास्ट स्रोतकाअनुसार अन्तरिक्षमा नानो भूउपग्रह छोड्ने दिन नेपाल र जापान दुवै देशमा कार्यक्रम आयोजना हुनेछन् ।

    जापानस्थित क्युशु इन्स्टिच्युट अफ टेक्नोलोजी(क्युटेक)मा भूउपग्रह प्रविधिमा विद्यावारिधि गरिरहेका आभाष मास्केले क्युटेकको बर्ड्स परियोजना अन्तर्गत छात्रवृत्तिमा नानो भूउपग्रह निर्माण गरेका हुन् । उनको अध्ययनलाई नेपाल सरकारले आर्थिक सहयोग गरी अन्तरिक्षमा पुर्‍याएको हो ।

    जापानले आफ्नो छुट्टै अन्तरिक्ष अनुसन्धान कार्यक्रम नभएका देशहरुलाई सहयोग गर्न ज्वाइन्ट ग्लोबल मल्टिनेसनल बर्डस् स्याटलाइट परियोजना सञ्चालन गर्दै आएको छ ।

    अमेरिकी कार्गो रकेटले अन्तर्राष्ट्रिय अन्तरिक्ष केन्द्र (आइएसएस) मा पुर्‍याएको यो पहिलो नानो स्याटलाइट ‘नेपाली स्याट वान’ हो ।

     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast