शनिबार, श्रावन ४, २०७६
    धर्म-संस्कृति

    राष्ट्रपति भण्डारी जनकपुरमा, जानकी मन्दिरमा पूजाअर्चना

    सोमबार, ३० बैशाख २०७६, आहाखबर

    जनकपुर, ३० वैशाख ।

    जनकपुरसहित मिथिलाञ्चल क्षेत्रमा सोमबार जानकीको जन्मोत्सव ‘जानकी नवमी’ धुमधामका साथ मनाइँदैछ । 

    सीता जन्मिएको दिनलाई अवसर पारेर मनाइने जानकी नवमीमा सहभागी हुन राष्ट्रपति विद्यादेवी भण्डारी सोमबार बिहान जनकपुर पुगेकी छिन् । जानकी मन्दिरले आयोजना गरेको विशेष कार्यक्रममा सहभागी भएर राष्ट्रपति भण्डारीले विशेष पूजाअर्चना गरेकी छिन् ।

    सेनाको हेलिकोप्टरले जनकपुर आएकी राष्ट्रपति भण्डारीले जानकी मन्दिरमा विशेष पूजाअर्चना गरेकी छिन् ।

    मन्दिरमा विशेष पूजाअर्चनापछि राष्ट्रपति भण्डारी, प्रदेश २ का मुख्यमन्त्री लालबाबु राउत र जानकी मन्दिरका महन्थ रामतपेश्वर दासले सम्बोधन गर्ने कार्यक्रम समेत तय गरिएको जानकारी दिईएको छ ।

    यस वर्ष जनकपुरलाई विकासको दिशामा अघि बढाउन एवम् मिथिलाको धार्मिक सम्पदा, कला, संस्कृति र भेषभूषालाई उजागर गर्न जानकी जन्मोत्सव धुमधामसँग आयोजना गरिएको छ । बैशाख २२ बाट सुरु भएको जन्मोत्सव जेठ ४ मा समापन हुनेछ ।

    प्रदेश २ को सरकारले जानकी नवमीको अवसरमा सोमबार सार्वजनिक बिदा समेत दिएकाे छ ।

    मुख्यमन्त्री राउतले आइतबार शुभकामना सन्देश जारी गर्दै जानकी नवमीको दिन प्रदेश २ मा सार्वजनिक बिदादिइएको घोषणा गरेका थिए ।

    जन्मोत्सवमा  धार्मिक प्रवचन, सांस्कृतिक प्रदर्शनी, रामायण मेला, मंगलधुन, रामायणमा आधारित हाजिरीजवाफ प्रतियोगितालगायतका कार्यक्रम आयोजना गरिँदैछ । त्रेतायुगमा जानकीले दूधमती नदीमा स्नान गरेको किंबदन्ती रहेको पाइन्छ ।

    तपाईको समाचार, लेख /रचना वा सुझाव भएमा aahakhabar@gmail.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast