मंगलवार, जेष्ठ २०, २०७७
    राज्य-समाज

    ‘प्रधानमन्त्रीज्यू, तपाईको घाँटीमा झुण्डिएको सम्मान होइन, अपमान हो’

    धर्म प्रचारक गैरसरकारी संस्थाकाे शरणमा लम्पसार परेकाे भन्दै पार्टीभित्र र बाहिरबाट चर्काे अालाेचना

    सोमबार, १७ मंसिर २०७५, आहाखबर

    काठमाडौँ, १७ मङ्सिर

    विवादास्पद युनिफिकेशन चर्चकी धर्मगुरु तथा स्वघाेषित ‘जिससकी छाेरी’ डा‍ हाक जा हान मुनले प्रधानमन्त्री केपी शर्मा अाेलीलार्इ १ लाख डलरकाे ‘सुशासन’ अवार्ड प्रदान गरिन् । खासमा देशकै प्रमुख कार्यकारीले अन्तर्राष्ट्रिय अवार्ड पाउँदा बधार्इ पाउनुपर्ने हाे तर अहिले प्रधानमन्त्री अाेलीकाे सर्वत्र अालाेचना र खिसिट्युरी भइरहेकाे छ ।

    उनले राष्ट्रिय स्वाभिमान नै बन्धकीमा राखेर एउटा धर्म प्रचारक गैरसरकारी संस्थाकाे शरणमा लम्पसार परेकाे भन्दै उनकै पार्टीभित्र र बाहिरबाट चर्काे अालाेचना भइरहेकाे छ । क्रिश्चियन धर्मप्रचारक संस्था युनिभर्सल पिस फाउन्डेसनबाट आइतवार करिब १ करोड ११ लाख रुपैयाँसहितको  'लिडरसिप एन्ड गुड गभर्नेन्स' अवार्ड थापेपछि प्रधानमन्त्रीको चर्को आलोचना भएको हो । 

    सामाजिक सञ्जालमा प्रधानमन्त्रीकै पार्टी नेकपाका कार्यकर्तादेखि सर्वसाधरणसम्मले एउटा विवादित संस्थाको सम्मान थापेर प्रधानमन्त्रीले दुईतिहाइ बहुमतकै बेइज्जत गरेको पनि गुनासो गरेका छन् । 

    आलोचना भइरहेको यही मेसोमा जोडिन पुगेका छन् विवेकशील-साझा पार्टीका संयोजक रवीन्द्र मिश्र । संयोजक मिश्रले त अन्यको भन्दा कडा शब्दसहितको धारणा सामाजिक सञ्जालमा सार्वजनिक गरेका छन् । 

    उनले प्रधानमन्त्रीको पछिल्लो गतिविधि अति भएको बताउँदै आइतवार थापिएको अवार्डले सम्मान नभइ अपमान गरेको बताएका छन् । 'यो त अति भयो। तपाईं देशको प्रधानमन्त्री-हामी सबैको प्रधानमन्त्री देशको प्रधानमन्त्रीले जसले जे पुरस्कार दियो', उनले भनेका छन्, 'त्यसैका लागि शिर नुहाउने? धर्म प्रचारक संस्थाले दिएको पुरस्कार थाप्ने ?'

    पछिल्लो समय कु-शासन र खराब नेतृत्वका कारण आलोचित भइरहेकाले बेला यो पुरस्कार लिनु सरासर अनुचित भएको मिश्रको भनाइ छ । 'देशमा खराब नेतृ्त्व र कुशासनका लागि हरदिन यतिबिघ्न आलोचना भइरहेका बेला "नेतृत्व र सुशासन पुरस्कार" लिन अफ्टेरो लागेन?', प्रधानमन्त्रीमाथि कसिलो निशाना लगाउँदै मिश्रले भनेका छन् । 

    सरकार एकपछि अर्को भ्रष्टाचार र कु-शासनमा फसेको बताउँदै मिश्रले प्रधानमन्त्री भ्रममा रहेको  बताए । 'कि निर्मलालाई न्याय, वाइड बडी विमान, राष्ट्रपतिलाई गाडी, भ्रष्टाचारका अन्य मामिला तथा विकास आदि सबै विषयमा गज्जब काम गरेको छु भन्ने भ्रममा हुनुहुन्छ?', मिश्रले अगाडि सोधेका छन् । 

    मिश्रले यस्तै गतिविधि गरिरहेमा प्रधानमन्त्रीको भ्रम चाँडै टुट्ने पनि चेतावनी दिएका छन् । 'हुनत, बारम्बार जनताकै मत जितेर आउनु भएको हो। सम्भवत: हामी नेपाली तपाईंकै लागि योग्य छौं भन्ठान्नुभएको होला', मिश्रले भनेका छन्,  'तर तपाईंको त्यो भ्रम अब लामो समय टिक्नेवाला छैन।'

    यसै क्रममा पूर्व प्रधानमन्त्री डा बाबुराम भट्टरार्इले ट्वीटरमार्फत प्रम अाेलीलार्इ सुझाव दिएका छन् । नयाँ शक्ति पार्टीका संयाेजक समेत रहेका उनले आफ्नो खस्कँदै गएको लोकप्रियता र छवि सुधार्न ‘ईश्वर’का छोरीबाट आशीर्वाद थाप्न,पोलपोलमा आफ्नै फोटो झुण्ड्याउनुकाे सट्टा अहिले प्रत्येक नेपालीको हृदयमा गडेकी जनताकी छोरी निर्मला पन्तका बलात्कारी-हत्यारा छिटो सार्वजनिक गर्न सुझाव दिएका हुन् ।

    यसैगरी विवेकशील साझा पार्टीका नेता सूर्यराज अाचार्यले सरकार बन्दा शुरुमा जनताले जुन आशा जगाएका थिए त्याे अहिले कमजाेर हुँदै गएकाे बताएका छन् । उनले भनेका छन्- ‘पोलमा पोस्टर टाँस्ने/च्यात्ने र ‘ख्रिस्तानिदेवी’बाट आशीर्वाद थाप्ने जस्ता ‘लम्फु’ काममा चैं सरकार माहिर देखियो ।’

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast