बुधबार, जेष्ठ २१, २०७७
    स्कुल-कलेज

    महिनावारी हुँदा छात्राहरू अनुपस्थित हुने क्रम बढेपछि विद्यालयद्वारा सेनेटरी प्याड वितरण !

    “विद्यालय आएको समयमा महिनावारी भयो भने बिदा मागेर घर जाने गरेकी थिएँ तर अब भने त्यस्तो समस्या हुँदैन ।”

    सोमबार, १७ मंसिर २०७५, आहाखबर

    दमौली, १७ मङ्सिर

    महिनावारी हुँदा छात्राहरू विद्यालय नआउने क्रम बढेपछि सामाजिक उत्थान नेपालले तनहुँको ब्यास नगरपालिका–१२ कमलाबारीस्थित सिद्धेश्वरी माध्यमिक विद्यालयका छात्रालाई सेनेटरी प्याड वितरण गरेको छ । 

    महिनावारी भएको समयमा छात्रा विद्यालयमा अनुपस्थित हुने गरेको पाइएपछि उक्त संस्थाले विद्यालयमा कक्षा ७, ८, ९ र १० मा अध्ययन गर्ने ८० छात्राहरुलाई धुन मिल्ने सेनेटेरी प्याड वितरण गरेको हो । 

    पोखरा डेज संस्थाद्वारा उपलब्ध गराइएको रु ६० हजार बराबरको सेनेटरी प्याड सहितको झोला छात्रालाई हस्तान्तरण गरिएको संस्थाकी अध्यक्ष नोमा थापाले जानकारी दिईन् । उनका अनुसार उक्त सेनेटरी प्याड वातावरणमैत्री रहेको र तीन वर्षसम्म प्रयोग गर्न सकिन्छ । 

    “महिनावारी भएको समयमा छात्रा विद्यालयमा अनुपस्थित हुनाका साथै विद्यालय आएको समयमा महिनावारी भयो भने पनि कक्षा नै छाडेर नै जाने गरेका छन्,” विद्यालयका प्रधानाध्यापक नारायणप्रसाद अधिकारीले भने, “तीन÷चार दिनसम्म पनि विद्यालय नआएको तथ्याङ्क छ ।” 

    कक्षा १० मा अध्ययनरत मूर्तिकला उपरकोटीले महिनावारी हुँदा लाजका कारण विद्यालय आउन नसक्ने गरेको बताए । उनले भने, “विद्यालय आएको समयमा महिनावारी भयो भने बिदा मागेर घर जाने गरेकी थिएँ तर अब भने त्यस्तो समस्या हुँदैन ।” 

    केही समयअघि मात्रै ब्यास नगरपालिका–१ स्थित जलदेवी माध्यमिक विद्यालयका छात्रालाई उक्त प्याड वितरण गरेको र ब्यास नगरपालिका–१ कै निर्मल माध्यमिक विद्यालय र कास्कीको सहारा आधारभूत विद्यालयमा पुनः प्रयोग गर्न मिल्ने प्याड बनाउने तालीम सञ्चालन गरिएको उक्त संस्थाका अध्यक्ष थापाले जानकारी दिए । 

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast